ഇന്ത്യന്‍ വനിതകള്‍ മുട്ടുമടക്കി, ഏഷ്യാകപ്പില്‍ ബംഗ്ലാ വനിതകളുടെ ഗര്‍ജനം

ക്വാലാലംപൂര്‍: മലേഷ്യയില്‍ നടന്ന പ്രഥമ വനിത ട്വന്റി20 ഏഷ്യാകാപ്പില്‍ ഇന്ത്യയ്ക്ക് ഫൈനലില്‍ തോല്‍വി. ബംഗ്ലാദേശ് മൂന്ന് വിക്കറ്റിനാണ് ഇന്ത്യയെ പരാജയപ്പെടുത്തിയത്. ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ നിശ്ചിത ഓവറില്‍ ഒമ്പത് വിക്കറ്റ് നഷ്ടത്തില്‍ 112 റണ്‍സാണ് നേടിയത്. മറുപടി ബാറ്റിംഗില്‍ അവസാന പന്തില്‍ ബംഗ്ലാദേശ് ആവേശ ജയം സ്വന്തമാക്കി.

ഇന്ത്യയ്ക്കായി ക്യാപ്റ്റന്‍ ഹര്‍മന്‍ പ്രീത് കൗര്‍ മാത്രമാണ് തിളങ്ങിയത്. അര്‍ധ സെഞ്ചുറി നേടിയ താരം 42 പന്തില്‍ 56 റണ്‍ നേടി. മറുപടി ബാറ്റിങ്ങിനിറങ്ങിയ ബംഗ്ലദേശിനു വേണ്ടി നിഗര്‍ സുല്‍ത്താന 24 പന്തില്‍ 27 റണ്‍സും റുമാന അഹമ്മദ് 22 പന്തില്‍ 23 റണ്‍സുമെടുത്തു.

ഇന്ത്യയ്ക്കു വേണ്ടി നാലോവറില്‍ ഒന്‍പത് റണ്‍സ് മാത്രം വിട്ടുനല്‍കി പൂനം യാദവ് നാലു വിക്കറ്റ് വീഴ്ത്തി.