തെരുവുനായ്ക്കളുടെ ആക്രമണത്തിൽ രണ്ടു വയസ്സുകാരിക്ക് ദാരുണാന്ത്യം

രണ്ടു വയസ്സുകാരിയെ തെരുവ് നായ്ക്കൾ കടിച്ചുകീറി കൊലപ്പെടുത്തി.  തിങ്കളാഴ്ച ഉച്ചകഴിഞ്ഞ് 2.30 ഓടെയാണ് സംഭവം. ഗുരുതരമായ പരുക്കുകളോടെ കുട്ടിയെ ആശുപത്രിയില്‍ എത്തിച്ചെങ്കിലും മരിച്ചു. ഗാസിയാബാദിലെ മോഡി നഗറിനു സമീപത്തുവെച്ചാണ് ശിവാനിയെ നായ്ക്കൾ ആക്രമിച്ചത്.

മകളെ വീടിനു പുറത്ത് കളിക്കാന്‍ അയച്ചശേഷം അമ്മ വെള്ളമെടുക്കുന്നതിനായി പുറത്തേക്ക് പോയിരുന്നു. ഈ സമയം വീട്ടുമുറ്റത്ത് കളിച്ചുകൊണ്ടിരുന്ന ശിവാനിയെ കാണാതാവുകയായിരുന്നു. പിന്നീട് വീടിനു കുറച്ചകലെയുള്ള പാടത്തുനിന്ന് നായ്ക്കള്‍ കടിച്ചുകീറിയ നിലയിൽ കുഞ്ഞിനെ കണ്ടെത്തുകയായിരുന്നു.
ഇലക്‌ട്രീഷ്യനാണ് പെണ്‍കുട്ടിയുടെ പിതാവ്. സംഭവ സമയം ഇയാൾ ജോലി സ്ഥലത്തായിരുന്നു.

പെണ്‍കുട്ടി നായ്ക്കളുടെ ആക്രമണത്തില്‍ തന്നെയാണ് കൊല്ലപ്പെട്ടതെന്നും മറ്റു ദുരൂഹതകളൊന്നുമില്ലെന്നും ഗാസിയാബാദ് എസ്.പി വൈഭവ് കൃഷ്ണ പറഞ്ഞു. നായ്ക്കളുടെ ആക്രമണത്തില്‍ തന്നെയാണ് മരണം നടന്നിരിക്കുന്നതെന്ന് കുട്ടിയെ പരിശോധിച്ച ഡോക്ടറും വ്യക്തമാക്കി.