ഇന്ത്യയിലെ ആദ്യ വനിതാ ഡോക്ടറായ ആനന്ദി ഗോപാൽ ജോഷിയുടെ 153 മത് ജന്മദിനം ആഘോഷിച്ച് ഗൂഗിൾ ഡൂഡിൽ. പാശ്ചാത്യ വൈദ്യ ശാസ്ത്രത്തില്‍ ബിരുദം നേടിയ ആദ്യത്തെ രണ്ട് ഇന്ത്യന്‍ വനിതകളില്‍ ഒരാളായ ആനന്ദിബായ് ജോഷിക്ക് (ആനന്ദി ഗോപാല്‍ ജോഷി) ആദരം അർപ്പിക്കുകയാണ് ഗൂഗിൾ .
ബിരുദ സര്‍ട്ടിഫിക്കറ്റ് കൈയില്‍ പിടിച്ചുനില്‍ക്കുന്ന രീതിയിലാണ് ഡൂഡിലൊരുക്കിയിരിക്കുന്നത്. ജീവന്‍റെ നിറമായ പച്ച ചുറ്റിനില്‍ക്കുന്ന ആനന്ദിബായി കഴുത്തില്‍ മാലപോലെ സ്റ്റെഥസ്കോപ്പും അണിഞ്ഞിട്ടുണ്ട്.
ബ്രിട്ടീഷ് ഇന്ത്യയിലെ ആദ്യത്തെ വനിതാ ഡോക്ടറായിരുന്നു ആനന്ദിബായി. സ്ത്രീകള്‍ക്ക് വീടിനു പുറത്തേയ്ക്കു പോലും സഞ്ചരിക്കാന്‍ അനുവാദമില്ലാതിരുന്ന കാലത്താണ് കടല്‍ കടന്നുപോയി വിദ്യാസം ചെയ്ത വനിതയെന്ന ബഹുമതി ആനന്ദി നേടിയത്.
പൂനെയിലെ ഒരു സമ്പന്ന യാഥാസ്ഥിതിക ബ്രാഹ്മണ കുടുംബത്തിലാണ് ജനനം. യമുന എന്നായിരുന്നു ആദ്യത്തെ പേര്. ഒമ്പതാം വയസ്സിൽ തന്നേക്കാൾ 20 വയസ്സിനു മൂപ്പുള്ള ഗോപാൽ റാവു എന്ന വിഭാര്യനുമായി യമുനയുടെ വിവാഹം നടത്തപ്പെട്ടു. കല്യാണിൽ തപാൽ വകുപ്പിൽ ഗുമസ്തനായിരുന്ന ഗോപാൽ റാവുവാണ് യമുനയുടെ പേര് ആനന്ദിബായ് എന്നു മാറ്റിയത്.
അദ്ദേഹത്തിന് കല്യാണിൽ നിന്ന് അലിബാഗിലേക്കും ഒടുവിൽ കൽക്കട്ടയിലേക്കും സ്ഥലം മാറ്റമുണ്ടായി. സ്ത്രീകളുടെ വിദ്യാഭ്യാസത്തെ പിന്തുണച്ചിരുന്ന ഒരു പുരോഗമനവാദിയായിരുന്നു ഗോപാൽ റാവു. ആ കാലഘട്ടത്തിൽ സംസ്കൃതം പഠിക്കുന്നതിലും പ്രയോജനപ്രദം ഇംഗ്ലീഷ് പഠിക്കുന്നതാണെന്ന് തിരിച്ചറിഞ്ഞ അദ്ദേഹം ആനന്ദിബായിയെ ഇംഗ്ലീഷ് വിദ്യാഭ്യാസം നേടുവാൻ സഹായിച്ചു.
ആനന്ദിബായിയുടെ 14-ആം വയസ്സിൽ അവർക്കൊരു മകൻ ജനിച്ചു. വേണ്ടത്ര വൈദ്യ സഹായം ലഭിക്കാതിരുന്നതിനാൽ 10 ദിവസം മാത്രമേ ആ കുഞ്ഞ് ജീവിച്ചിരുന്നുള്ളൂ. ഈ സംഭവം അവരുടെ ജീവിതത്തിലൊരു വഴിത്തിരിവായി.
കത്തുകള്‍ വഴി പരിചയപ്പെട്ട, ന്യൂ ജഴ്സിയിലെ തിയോഡിക്ക കാര്‍പെന്‍റര്‍ എന്ന സ്ത്രീയുടെ സഹായത്തോടെ, വൈസ്രോയിയടക്കം ഇന്ത്യയുടെ വിവിധ ഭാഗങ്ങളില്‍ നിന്നുള്ളവരുടെ സാമ്പത്തിക സഹായവുമായി 1883 ജൂണില്‍ അവര്‍ ന്യൂയോര്‍ക്കില്‍ കപ്പലിറങ്ങി. വിമന്‍സ് മെഡിക്കല്‍ കോളജ് ഓഫ് പെന്‍സില്‍‌വാനിയയില്‍ എന്‍റോള്‍ ചെയ്തു. 1886മാര്‍ച്ച്‌ 11-ന് എംഡി ബിരുദം നേടി.
1886-ല്‍ ഇന്ത്യയില്‍ മടങ്ങി എത്തിയ ആനന്ദിക്ക് വന്‍വരവേല്‍പ്പ് ലഭിച്ചു. പിന്നീട് കോലാപ്പൂര്‍ നാട്ടു രാജ്യത്ത് ആല്‍ബര്‍ട്ട് എഡ്വേര്‍ഡ് ആശുപത്രിയില്‍ നിയമിതയായി. എന്നാല്‍ തന്‍റെ 21-ാം വയസില്‍ ആനന്ദി നിര്യാതയായി
Post Your Comments