ഉപതെരഞ്ഞെടുപ്പ് : യോഗിയുടെ മണ്ഡലത്തില്‍ എസ്.പിയ്ക്ക് ലീഡ്

ന്യൂഡല്‍ഹി•ഉത്തര്‍പ്രദേശിലേയും ബീഹാറിലെയും മൂന്ന് ലോക്സഭാ മണ്ഡലങ്ങളിലും രണ്ട് നിയമസഭാ മണ്ഡലങ്ങളിലും നടന്ന ഉപതെരെഞ്ഞെടുപ്പിന്റെ വോട്ടെണ്ണല്‍ പുരോഗമിക്കുന്നു.

യു.പിയില്‍ യോഗി ആദിത്യനാഥിന്റെ മണ്ഡലമായ ഗോരഖ്പൂരില്‍ സമാജ്വാദി പാര്‍ട്ടി സ്ഥാനാര്‍ഥി പ്രവീണ്‍ കുമാര്‍ നിഷാദ് ലീഡ് ചെയുന്നു. 44,979 വോട്ടുകള്‍ നേടിയ പ്രവീണ്‍ കുമാറിന് 1,523 വോട്ടിന്റെ ലീഡാണ് ഉള്ളത്. 43,456 വോട്ടുകളോടെ ബി.ജെ.പിയുടെ ഉപ്രേന്ദ്ര ദത്ത് ശുക്ലയാണ് രണ്ടാം സ്ഥാനത്ത്.

ഇവിടെ തുടക്കത്തില്‍ സമാജ്‌വാദി പാര്‍ട്ടിയുടെ പ്രവീണ്‍ കുമര്‍ നിഷാദിന് ആയിരുന്നു ലീഡ്. പിന്നീട് ലീഡ് ബി.ജെ.പി തിരികെ പിടിച്ചെങ്കിലും ഒടുവില്‍ ലീഡ് നില വീണ്ടും മാറിമറിയുകയായിരുന്നു.

ഫുല്‍പൂരിലും സമാജ്വാദി പാര്‍ട്ടിയുടെ നഗ്രേന്ദ്ര പ്രതാപ്‌ സിംഗ് 6,931 വോട്ടുകള്‍ക്ക് ലീഡ് ചെയ്യുന്നു. ഭുബൂവായില്‍ ബി.ജെ.പി സ്ഥാനാര്‍ഥി 2,528 വോട്ടുകള്‍ക്ക് ലീഡ് ചെയ്യുന്നു. ജഹനാബാദ് അസംബ്ലി സീറ്റില്‍ ആര്‍.ജെ.ഡി 8,899 വോട്ടുകള്‍ക്ക് ലീഡ് ചെയ്യുന്നു.

അരാരിയ ലോക്സഭാ മണ്ഡലത്തില്‍ 8,979 വോട്ടുകള്‍ക്ക് ബി.ജെ.പി സ്ഥാനാര്‍ഥി ലീഡ് ചെയ്യുന്നു. ബി.ജെ.പിയ്ക്ക് ഇതുവരെ ഇവിടെ 1,13,169 വോട്ടുകള്‍ ലഭിച്ചപ്പോള്‍ ആര്‍.ജെ.ഡി 1,04,190 വോട്ടുകള്‍ നേടി.