വിനോദ സഞ്ചാരികളെ പോലെ കറങ്ങി നടന്ന സ്ത്രീകളുള്‍പ്പെട്ട കള്ളനോട്ട് വിതരണ സംഘം ഹോട്ടലുടമയുടെ പിടിയിലായതിങ്ങനെ

കോതമംഗലം: കാറില്‍ കള്ളനോട്ടുമായെത്തിയ രണ്ടു സ്ത്രീകളടക്കം മൂന്നു പേരെ തലക്കോട് ഫോറസ്റ്റ് ചെക്പോസ്റ്റില്‍ പൊലീസ് അറസ്റ്റ് ചെയ്തു. ഇവര്‍ അടിമാലിക്കു സമീപം ഇരുമ്പുപാലത്തു ഭക്ഷണം കഴിച്ച ഹോട്ടലില്‍ നല്‍കിയ രണ്ടായിരത്തിന്റെ നോട്ട് കള്ളനോട്ടാണെന്നു കടയുടമ കണ്ടെത്തിയിരുന്നു. മുംബൈയില്‍ താമസിക്കുന്ന ബംഗാള്‍ സ്വദേശിനികളായ സുവാന ഷെയ്ക്ക് (27), സഹിന്‍ (24), പൊന്‍കുന്നം സ്വദേശി മാളിയേക്കല്‍ അനൂപ് (40) എന്നിവരെയാണ് ഊന്നുകല്‍ പൊലീസ് അറസ്റ്റ് ചെയ്തത്. കൊച്ചിയില്‍നിന്ന് അനൂപ് വാടകയ്ക്കെടുത്ത കാറിലായിരുന്നു സംഘത്തിന്റെ യാത്ര.

സംഘത്തിന്റെ കൈവശം അഞ്ചു ലക്ഷത്തിലേറെ രൂപ ഉണ്ടായിരുന്നു. ഇതില്‍ ഇടകലര്‍ത്തി വച്ചിരുന്ന 20,000 രൂപയുടെ കള്ളനോട്ടാണു പൊലീസ് പിടികൂടിയത്. കബളിപ്പിക്കപ്പെട്ട ഹോട്ടലുടമ നല്‍കിയ സന്ദേശത്തെ തുടര്‍ന്നാണു തലക്കോട് ഫോറസ്റ്റ് ചെക്പോസ്റ്റില്‍ പ്രതികളെ പിടികൂടിയത്. മൂന്നാറില്‍ നിന്നു മടങ്ങിയ സംഘം ഇടുക്കി ജില്ലയിലും മറ്റും കള്ളനോട്ട് വിതരണം ചെയ്തിട്ടുണ്ടെന്നാണു സൂചന. പ്രതികള്‍ സംസ്ഥാനാന്തര കള്ളനോട്ടു സംഘത്തിലെ കണ്ണികളാണെന്നു സംശയിക്കുന്നതായി പൊലീസ് പറഞ്ഞു. എസ്‌ഐ ടി.എം. സൂഫിയുടെ നേതൃത്വത്തിലാണ് കേസന്വേഷണം.