മീൻ തിന്നുന്ന പൂച്ചകൾ കൂട്ടത്തോടെ ചത്തുവീഴുന്നു; മത്തിയിലും അയലയിലും ഉഗ്രവിഷം അടങ്ങിയിട്ടുണ്ടെന്ന് സൂചന

മൂലമറ്റം: മീൻ തല കഴിച്ച പൂച്ചകൾ കൂട്ടത്തോടെ ചത്തൊടുങ്ങുന്നതായി റിപ്പോർട്ട്. ഒരു മാസം മുൻപ് കജനാപ്പാറയിൽ 28 പൂച്ചകളെ ചത്തനിലയിൽ കണ്ടെത്തിയിരുന്നു. അറക്കുളം മൈലാടി വിഴുക്കപ്പാറയിൽ ഷാജി വളർത്തുന്ന 16 പൂച്ചകളിൽ എട്ടെണ്ണവും ചത്തുവീണു. വിഷാംശം അകത്തുചെന്നതോ വൈറസ് ബാധയോ ആണ് പൂച്ചകളുടെ മരണകാരണമെന്നാണ് നിഗമനം.

അലഞ്ഞുതിരിഞ്ഞു നടക്കുന്ന പൂച്ചകളെയാണ് ഷാജി സംരക്ഷിക്കുന്നത്. കഴിഞ്ഞ ദിവസം പൂച്ചകൾക്ക് കൊടുക്കാനായി ഷാജി മത്തിയും അയലയും വാങ്ങിയിരുന്നു. കുറച്ചുമാസങ്ങൾക്ക് മുൻപ് വണ്ണപ്പുറത്തെ മത്സ്യവിൽപ്പനശാലയിൽ ഈച്ചയെ അകറ്റാൻ കീടനാശിനി സ്പ്രേ ചെയ്യുന്ന വീഡിയോ സോഷ്യൽ മീഡിയയിൽ വൈറലായെങ്കിലും നടപടി ഒന്നും ഉണ്ടായില്ലെന്നാണ് നാട്ടുകാർ പറയുന്നത്.