ഇരട്ട ഗോളുമായി ഛേത്രി, ജയത്തോടെ ബംഗളൂരു ഒന്നാമത്

മുംബൈ: സുനില്‍ ഛേത്രിയുടെ ഇരട്ടഗോള്‍ മികവില്‍ ബംഗളൂരു എഫ്‌സിക്ക് ജയം. ഈ സീസണില്‍ ക്ലബ്ബിന്റെ ഏഴാം ജയമാണിത്. മുംബൈ സിറ്റി എഫ്‌സിയെ അവരുടെ തട്ടകത്തില്‍ ഒന്നിനെതിരെ മൂന്ന് ഗോളുകള്‍ക്കാണ് ബംഗളൂരു കെട്ടുകെട്ടിച്ചത്. 43, 52 മിനിറ്റുകളില്‍ സുനില്‍ ഛേത്രി ഗോള്‍ കണ്ടെത്തി. ശേഷം നിക്കോളാസ് ഫെഡോര്‍ മികു 63-ാം മിനിറ്റില്‍ ബംഗളൂരുവിന്റെ ലീഡ് വീണ്ടും ഉയര്‍ത്തി. മുംബൈക്കായ് 76-ാം മിനിറ്റില്‍ ലിയോ കോസ്റ്റ ആശ്വാസ ഗോള്‍ നേടി.

ആദ്യ പകുതിയുടെ അവസാന മിനിറ്റുകളിലാണ് ബംഗളൂരുവിന്റെ ആദ്യ ഗോള്‍ പിറന്നത്. ബല്‍വത്ത് സിംഗിന്റെ ഫൗളില്‍ ലഭിച്ച പെനാല്‍റ്റി ഛേത്രി മുംബൈയുടെ വലയ്ക്കുള്ളിലാക്കുകയായിരുന്നു തുടര്‍ന്ന് 52-ാം പകുതിയില്‍ ഛേത്രി തന്നെ വീണ്ടും മുംബൈ വല കുലുക്കി. 63-ാം മിനിറ്റില്‍ മികു ബംഗളൂരുവിന്റെ ഗോള്‍ പട്ടിക തികച്ചു.

ജയത്തോടെ ബംഗളൂരു പോയിന്റ് പട്ടികയില്‍ ഒന്നാം സ്ഥാനത്തെത്തി. 21 പോയിന്റാണ് ബംഗളൂരുവിന് ഉള്ളത്. അഞ്ചാം സ്ഥാനത്താണ് മുംബൈ സിറ്റി എഫ് സി.