ലോകത്തിലെ മികച്ച വിമാനക്കമ്പനികള്‍ ഇവയാണ്: ആദ്യപത്തില്‍ ഇടംപിടിച്ച് യു.എ.ഇ വിമാനക്കമ്പനിയും

ദുബായ്•ലോകത്തിലെ മികച്ച വിമാനക്കമ്പനികകളുടെ പട്ടികയില്‍ ഒരിക്കല്‍ കൂടി ഇടം നേടി യു.എ.ഇ. അബുദാബിയുടെ ഇത്തിഹാദ് എയര്‍വേയ്സ് ലോകത്തിലെ ഏറ്റവും മികച്ച ആദ്യ 10 വിമാനക്കമ്പനികളില്‍ ആറാം സ്ഥാനവും, മികച്ച ദീര്‍ഘദൂര വിമാനക്കമ്പനിയെന്ന ബഹുമതിയും സ്വന്തമാക്കിയപ്പോള്‍ ദുബായിയുടെ എമിറേറ്റ്സ് എയര്‍ലൈന്‍സ് മികച്ച ഇന്‍-ഫ്ലൈറ്റ് എന്റര്‍ടെയിന്‍മെന്റ് അവാര്‍ഡ് സ്വന്തമാക്കി.

വിമാനത്തിന്റെ കാലപ്പഴക്കം, യാത്രക്കാരുടെ അഭിപ്രായങ്ങള്‍, റേറ്റിംഗ്, ലാഭക്ഷമത, നിക്ഷേപ റേറ്റിംഗ്, ദീര്‍ഘദൂര റൂട്ടുകളിലെ ഇക്കോണമി-പ്രീമിയം സീറ്റിംഗ് ക്രമീകരങ്ങള്‍ തുടങ്ങി നിരവധി ഘടകങ്ങള്‍ പരിഗണിച്ചാണ് എയര്‍ലൈന്‍സ് റേറ്റിംഗ്സ് ഡോട്ട് കോം എന്ന വെബ്സൈറ്റ് മികച്ച വിമാനക്കമ്പനികളുടെ പട്ടിക തയ്യാറാക്കിയത്.

എയര്‍ന്യൂസിലന്‍ഡ്‌ ഇത്തവണയും ഒന്നാം സ്ഥാനം നിലനിര്‍ത്തി. മികച്ച പത്ത് എയര്‍ലൈനുകള്‍ക്ക് പുറമേ 20-20 വിഭാഗങ്ങളിലായി ഓരോ വിജയികളെയും തെരഞ്ഞെടുത്തിട്ടുണ്ട്.

അതിശയകരമെന്ന് പറയട്ടെ, ആദ്യ പത്തില്‍ ഒരൊറ്റ അമേരിക്കന്‍ വിമാനക്കമ്പനിയും ഇടംപിടിച്ചിട്ടില്ല.

ഏറ്റവും മികച്ച 10 വിമാനക്കമ്പനികള്‍ ഇവയാണ്.

1. എയര്‍ ന്യൂസിലന്‍ഡ്‌

2. ക്വന്റാസ്

3. സിംഗപ്പൂര്‍ എയര്‍ലൈന്‍സ്

4. വിര്‍ജിന്‍ ഓസ്ട്രേലിയ

5. വിര്‍ജിന്‍ അറ്റ്ലാന്റിക്

6. ഇത്തിഹാദ് എയര്‍വേയ്സ്

7. ആള്‍ നിപ്പോണ്‍ എയര്‍ലൈന്‍സ്

8. കൊറിയന്‍ എയര്‍

9. കാത്തി പസിഫിക്

10. ജപ്പാന്‍ എയര്‍ലൈന്‍സ്