കൊച്ചി: കേരളത്തില്‍ സര്‍വീസ് നടത്തുന്ന എല്ലാ ട്രെയിനുകളിലും മൊബൈല്‍ ഫോണുകള്‍ ചാര്‍ജ് ചെയ്യാനുള്ള സംവിധാനം വേണമെന്ന ആവശ്യവുമായി സംസ്ഥാന മനുഷ്യാവകാശ കമ്മിഷന്‍. നിലവില്‍ എല്ലാ ട്രെയിനുകളിലും ഫോണ്‍ ചാര്‍ജ് ചെയ്യാനുള്ള സംവിധാനം ഇല്ല. ഇത് സാധാരണ യാത്രക്കാര്‍ക്ക് വളരെ ബുദ്ധിമുട്ട് സൃഷ്ടിക്കുന്നുവെന്നും കമ്മിഷന്‍ ആക്റ്റിങ് അധ്യക്ഷന്‍ പി.മോഹനദാസ് ഉത്തരവില്‍ പറഞ്ഞു.
എന്നാല്‍ എ.സി കംപാര്‍ട്ടുമെന്റുകളില്‍ റീചാര്‍ജിങ് സംവിധാനമുണ്ട്. ലോക്കല്‍ കംപാര്‍ട്ട്‌മെന്റുകളില്‍ ഇല്ലാതിരിക്കുകയും എ.സി കംപാര്‍ട്ട്‌മെന്റുകളില്‍ ഉണ്ടാവുകയും ചെയ്യുന്നത് വിവേചനമാണെന്ന പരാതിയിലാണ് കമ്മിഷന്റെ നടപടി.
ജനശതാബ്ദി, പരശുറാം, ഏറനാട്, മാവേലി, അമൃത തുടങ്ങി കേരളത്തിനുള്ളില്‍ സര്‍വീസ് നടത്തുന്ന എല്ലാ ട്രെയിനുകളിലും എല്ലാ ബോഗികളിലും സംവിധാനം വേണമെന്നാണ് കൊച്ചി നഗരസഭാ കൗണ്‍സിലറും മനുഷ്യാവകാശ പ്രവര്‍ത്തകനുമായ തമ്പി സുബ്രഹ്മണ്യന്‍ സമര്‍പ്പിച്ച പരാതിയില്‍ പറയുന്നത്. സതേണ്‍ റയില്‍വേ ഡിവിഷണല്‍ മാനേജര്‍ മൂന്നാഴ്ചക്കകം വിശദീകരണം നല്‍കണമെന്ന് കമ്മിഷന്‍ നിര്‍ദേശിച്ചു.
Post Your Comments