മക്കളെ സ്കൂളിൽ അയക്കാൻ പോയ മലയാളി സൗദിയിൽ വാഹനാപകടത്തിൽ മരിച്ചു

റിയാദ്: മക്കളെ സ്കൂളിൽ അയക്കാൻ പോയ യുവാവ് സൗദിയിൽ വാഹനാപകടത്തിൽ മരിച്ചു. കോഴിക്കോട് മാവൂർ കൂളിമാട് പാഴൂർ സ്വദേശി എടക്കാട്ട് ഹൗസിൽ ഉമറാണ് (47) മരിച്ചത്. ബുധനാഴ്ച്ച രാവിലെ 8 മണിയോടെയാണ് സംഭവം നടക്കുന്നത്. റിയാദ് ബത്ഹയിലെ പ്രധാന റോഡിൽ ലുലു ഹൈപ്പർമാർക്കറ്റിനു മുൻവശത്താണ് അപകടം നടന്നത്.

മക്കളായ റൂബ (13), റഫ (എട്ട്), റന (നാല്) എന്നിവർ നിസ്സാര പരിക്കുകളോടെ രക്ഷപെട്ടു. അപകടത്തെ തുടർന്ന് ഇവരെ ഷുമൈസി ആശുപത്രിയിൽ പ്രവേശിപ്പിക്കുകയും വൈകിട്ടോടെ വിട്ടയക്കുകയും ചെയ്തു. ഉമർ ബത്ഹയിൽ തന്നെ ഉള്ള സ്കൂളിലേക്ക് മക്കളെ കൊണ്ടുപോകും വഴിയാണ് അപകടം സംഭവിച്ചത്. മഴയത്ത് വാഹനം തെന്നിയതാണ് അപകട കാരണം.

തെന്നിയ വാഹനം സഡൻ ബ്രേക്ക് ഇട്ട് നിർത്താൻ ശ്രമിക്കുന്നതിനിടെ നിയന്ത്രണം വിട്ട് കാർ റോഡിലെ മറ്റു മൂന്നു വാഹനങ്ങളുമായി കൂട്ടിയിടിച്ച ശേഷം റോഡിലെ ക്രോസ്സ്ബാർ ഇടിച്ചു തകർക്കുകയും തുടർന്ന് ഡിവൈഡറിലേക്ക് കേറിയാണ് കാർ നിന്നത്.