കൊല്ലം: 16കാരിയ്ക്കൊപ്പം നാടുവിട്ട 34കാരന്‍ അറസ്റ്റില്‍. കണ്ണൂരില്‍നിന്ന് അഞ്ചല്‍ പോലീസ് അറസ്റ്റ് ചെയ്തത് തടിക്കാട് കടമാന്‍കുഴി പുത്തന്‍വീട്ടില്‍ നിസാമി(34)നെയാണ്. ഇയാൾ മുൻപ് തലച്ചിറ, ചടയമംഗലം, നെടുമങ്ങാട് എന്നിവിടങ്ങളില്‍നിന്നു വിവാഹം കഴിച്ചിട്ടുണ്ട്. കുറച്ചുദിവസം മുമ്പു നെടുമങ്ങാട്ടെ ഭാര്യയിലുള്ള രണ്ടു കുട്ടികളോടൊപ്പമാണു പതിനാറുകാരിയുമായി സ്ഥലംവിട്ടത്.
നെടുമങ്ങാട് സ്വദേശിനി കുട്ടികളെയും ഭര്‍ത്താവിനെയും കാണ്‍മാനില്ലെന്നു കാട്ടി പോലീസിനു പരാതി നല്‍കിയിരുന്നു. ഇതിന്റെ അന്വേഷണം തുടരുന്നതിനിടെയാണു അഞ്ചല്‍ പോലീസ് സ്റ്റേഷനിൽ പെണ്‍കുട്ടിയെ കാണ്മാനില്ലെന്ന പരാതിയുമായി ബന്ധുക്കള്‍ എത്തിയത്. പെണ്‍കുട്ടി നിസാമിനോടൊപ്പം കണ്ണൂരിലുണ്ടെന്നു റൂറല്‍ എസ്.പി:ബി. അശോകന്റെ നിര്‍ദ്ദേശപ്രകാരം സൈബര്‍ സെല്ലിന്റെ സഹായത്തോടെ മൊബൈല്‍ ടവര്‍ കേന്ദ്രീകരിച്ചു നടത്തിയ അന്വേഷണത്തില്‍ കണ്ടെത്തി.
കണ്ണൂരില്‍ വാടകവീട്ടില്‍ താമസിച്ചുവന്ന നിസാമിനെയും പെണ്‍കുട്ടിയെയും രണ്ടു കുട്ടികളെയും അഞ്ചല്‍ സര്‍ക്കിള്‍ ഇന്‍സ്പെക്ടര്‍ എ. അഭിലാഷ്, എസ്.ഐ: പി.എസ്. രാജേഷ് എന്നിവരുടെ നേതൃത്വത്തിലുള്ള പോലീസ് സംഘം കസ്റ്റഡിയിലെടുത്തു. പോലീസ് അറിയിച്ചതനുസരിച്ച്‌ മുന്‍ ഭാര്യമാര്‍ അഞ്ചല്‍ പോലീസ് സ്റ്റേഷനിലെത്തി മൊഴി നല്‍കി. പെണ്‍കുട്ടിയെ രക്ഷാകര്‍ത്താക്കളോടൊപ്പം വിട്ടയച്ചു.
Post Your Comments