ന്യൂഡല്‍ഹി: പ്രധാനമന്ത്രി നരേന്ദ്രമോദി ഏതെങ്കിലും ഒരാളെ ട്വിറ്ററില്‍ ഫോളോ ചെയ്യുന്നു എന്നതിനര്‍ഥം അയാള്‍ക്ക് സ്വഭാവ സര്‍ട്ടിഫിക്കറ്റ് നല്‍കുന്നു എന്നല്ല എന്ന് ബി.ജെ.പിയുടെ സാമൂഹിക മാധ്യമ വിഭാഗം. കൊല്ലപ്പെട്ട മാധ്യമപ്രവര്‍ത്തക ഗൗരി ലങ്കേഷിനെ അശ്ലീലമായി അധിക്ഷേപിച്ചയാളുടെ ട്വിറ്റര്‍ അക്കൗണ്ട് പ്രധാനമന്ത്രി ഫോളോ ചെയ്തിരുന്നു. അതിനാല്‍ പ്രധാനമന്ത്രിയുടെ അക്കൗണ്ട് ബ്ലോക്ക് ചെയ്യണമെന്ന് ആവശ്യപ്പെട്ട് ‘ബ്ലോക്ക് നരേന്ദ്ര മോദി’ പ്രചരണം ട്വിറ്ററില്‍ വ്യാപകമായിരുന്നു. തുടര്‍ന്നാണ്മറുപടിയുമായി ബി.ജെ.പി രംഗത്തെത്തിയിരിക്കുന്നത്.
ബി.ജെ.പിയുടെ വിവരസാങ്കേതിക വിഭാഗം ദേശീയ നേതാവ് അമിത് മാളവ്യയാണ് മറുപടിയുമായി രംഗത്തെത്തിയിരിക്കുന്നത്. പ്രധാനമന്ത്രി ഒരാളെ ഫോളോ ചെയ്യുന്നത് അയാള്‍ക്കുള്ള സ്വഭാവ സര്‍ട്ടിഫിക്കറ്റല്ല. മാത്രമല്ല, പ്രധാനമന്ത്രി ഫോളോ ചെയ്യുന്നുവെന്നത് ആ വ്യക്തി എങ്ങനെ പെരുമാറുന്നു എന്നതിനുള്ള ഗ്യാരന്‍റിയുമല്ല. കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയേയും ഡല്‍ഹി മുഖ്യമന്ത്രി അരവിന്ദ് കെജ്രിവാളിനേയും മോദി ഫോളോ ചെയ്യുന്നുണ്ടെന്നും അമിത് മാളവ്യ പറഞ്ഞു.
മാത്രമല്ല, കോണ്‍ഗ്രസില്‍ ചേര്‍ന്ന മുന്‍ ബി.ജെ.പി പ്രവര്‍ത്തകന്‍ പര്‍ദേശ് പട്ടേലിനെ ഇപ്പോഴും ഫോളോ ചെയ്യുന്നുണ്ട്. പര്‍ദേശാകട്ടെ പ്രധാനമന്ത്രിയ്ക്കെതിരെ ഏറ്റവും മോശം വാക്കുകളാണ് ഉപയോഗിക്കുന്നത്. എന്നാല്‍ നമ്മുടെ പ്രധാനമന്ത്രി വ്യത്യസ്തനാണ്. അദ്ദേഹം അഭിപ്രായ സ്വാതന്ത്ര്യത്തില്‍ വിശ്വസിക്കുന്നു. ആരെയും ട്വിറ്ററില്‍ തടയുകയോ ഫോളോ ചെയ്യുന്നത് ഒഴിവാക്കുകയോ ചെയ്യില്ലെന്നും മാളവ്യ അവകാശപ്പെട്ടു.
Post Your Comments