തിരുവനന്തപുരം : നടിയെ ആക്രമിച്ച സംഭവവുമായി ബന്ധപ്പെട്ട് കോണ്‍ഗ്രസ് നേതാവും ആലുവ എം.എല്‍.എയുമായ അന്‍വര്‍ സാദത്തിന്റെ മൊഴി അന്വേഷണ സംഘം രേഖപ്പെടുത്തി. ആരോപണത്തിന്റെ നിഴലില്‍ നില്‍ക്കുമ്പോള്‍ അന്‍വര്‍ സാദത്ത് ദിലീപുമായി കൂടിക്കാഴ്ച നടത്തിയത് വന്‍ വിവാദമായിരുന്നു. രാഷ്ട്രപതി തിരഞ്ഞെടുപ്പില്‍ വോട്ട് ചെയ്യുന്നതിന് ബന്ധപ്പെട്ട് തിരുവനന്തപുരത്തുണ്ടായിരുന്ന അന്‍വര്‍ സാദത്തിനെ എം.എല്‍.എ ഹോസ്റ്റലില്‍ എത്തിയാണ് പെരുമ്പാവൂര്‍ സി.ഐ ബിജു പൗലോസിന്റെ നേതൃത്വത്തിലുള്ള സംഘമാണ് മൊഴിയെടുത്തത്.
നടി ആക്രമിക്കപ്പെട്ട ദിവസം അന്‍വര്‍ സാദത്ത് ദിലീപുമായി ഫോണില്‍ ബന്ധപ്പെട്ടിരുന്നു. ഇക്കാര്യങ്ങളെ സംബന്ധിച്ചെല്ലാം അന്വേഷണസംഘം ചോദിച്ചുവെന്ന് അന്‍വര്‍ സാദത്ത് മാദ്ധ്യമങ്ങളോട് പറഞ്ഞു. ഒരു സ്‌കൂളിന്റെ ഉദ്ഘാടനവുമായി ബന്ധപ്പെട്ടാണ് ദിലീപിനെ വിളിച്ചതെന്നും തൊട്ട് മുമ്പുള്ള ദിവസങ്ങളില്‍ ബന്ധപ്പെട്ടിരുന്നെങ്കിലും സംസാരിക്കാനായിരുന്നില്ലെന്നും തുടര്‍ന്നാണ് തൊട്ടടുത്ത ദിവസം സംസാരിച്ചതെന്നും അന്‍വര്‍ സാദത്ത് പൊലീസിനോട് പറഞ്ഞു. ദിലീപുമായുള്ള സാമ്പത്തിക ഇടപാടുകള്‍, വിദേശയാത്ര അടക്കമുളള കാര്യങ്ങളെ സംബന്ധിച്ചും അന്വേഷണ സംഘം ചോദിച്ചതായും അദ്ദേഹം വെളിപ്പെടുത്തി.
Post Your Comments