എസ്‌യുവിയുമായി സ്‌കോഡ എത്തുന്നു

പുത്തന്‍ താരങ്ങള്‍ എസ്‌യുവി വിപണിയില്‍ വന്നുകൊണ്ടിരിക്കുകയാണ്. തുടര്‍ച്ചയായി 20 ലക്ഷത്തിനും 30 ലക്ഷത്തിനും ഇടയിലുള്ള എസ്‌യുവികളാണ് എത്തുന്നത്. ഇസുസുവും ജീപ്പുമെല്ലാം എസ്‌യുവികള്‍ ഇന്ത്യയില്‍ ഇറക്കിക്കഴിഞ്ഞു. എല്ലാവര്‍ക്കും ഒരേ ലക്ഷ്യം- ടൊയോട്ടയുടെ മുന്‍തൂക്കം അവസാനിപ്പിക്കുക, എസ്‌യുവി തരംഗത്തിലെ ഒന്നാമനാവുക.

ജൂണോടെ സ്‌കോഡയുടെ കൊഡിയാക് വിപണിയിലെത്തും. മിക്ക ഷോറൂമുകളിലും കൊഡിയാക്ക് ബുക്കിംഗ് ആരംഭിച്ചുകഴിഞ്ഞു. ഫോക്‌സ് വാഗണിന്റെ വിഖ്യാതമായ എംക്യുബി പ്ലാറ്റ്‌ഫോമിലാണ് കൊഡിയാക് അവതരിക്കുക. 7 സീറ്റർ, 5 സീറ്റര്‍ വേരിയന്റുകള്‍ വാഹനത്തിനുണ്ടാകും. 25-30 ലക്ഷത്തിനുള്ളിലാകും വില. 1.4 ടിഎസ്‌ഐ,2.0 ടിഎസ്‌ഐ എന്നീ രണ്ട് എഞ്ചിന്‍ വേരിയന്റുകളിലാണ് കൊഡിയാക് നിരത്തിലിറങ്ങുന്നത്.

210 കിലോമീറ്റര്‍ വേഗതയില്‍ കുതിക്കാന്‍ ഈ എസ്‌യുവി ഭീമന് സാധിക്കും. ഫോര്‍ച്ച്യൂണറിന് പുറമെ ഫോര്‍ഡ് എന്‍ഡവറും മിസ്തുബുഷി പജീറോയുമാണ് കൊഡിയാക്കിന്റെ എതിരാളികള്‍. പുറമെ ഹ്യുണ്ടായ് സാന്റാഫെയും, ജീപ്പ് കോമ്പസും, ഇസുസുവിന്റെ പുത്തന്‍ എസ്‌യുവിയും കൂടിയാകുമ്പോള്‍ രംഗം കൊഴുക്കും. പോരായ്മകള്‍ പരിഹരിച്ച് റെക്സ്റ്റണുമെത്തും.