ആനക്കൂട്ടം കടയിൽ അതിക്രമിച്ച് കയറി; അകത്താക്കിയത് അഞ്ഞൂറിന്റെയും രണ്ടായിരത്തിന്റെയും നോട്ടുകൾ

ഗുവാഹട്ടി: സോണിപ്പൂര്‍ ജില്ലയിലെ തരാജുളി തേയിലത്തോട്ടത്തില്‍ ഭക്ഷണം തേടിയെത്തിയ നാല് കാട്ടാനകൾ അകത്താക്കിയത് 2000 ന്റെയും 500 ന്റെയും നോട്ടുകൾ. തേയിലത്തോട്ടത്തിലെ കടയില്‍ അതിക്രമിച്ചു കയറിയ ആനക്കൂട്ടം പണപ്പെട്ടിക്കുള്ളിലുണ്ടായിരുന്ന 26,000 രൂപയുടെ നോട്ടുകൾ ഭക്ഷണമാക്കുകയായിരുന്നു. 40,000 ത്തോളം രൂപയാണ് പണപ്പെട്ടിയിലുണ്ടായിരുന്നത്. ചെറിയ തുകയുടെ നോട്ടുകൾ ബാക്കി വെച്ചാണ് ആനകൾ ഉയർന്ന മൂല്യമുള്ള നോട്ടുകൾ അകത്താക്കിയത്.

പുലര്‍ച്ചെ രണ്ട് മണിയോടെയാണ് ആനകളുടെ ആക്രമണമുണ്ടായത്. സമീപത്തെ രണ്ട് വീടുകളും തകർത്താണ് ആനകൾ ഉള്ളിൽ കടന്നത്. ഇത് മൂന്നാം തവണയാണ് കാട്ടാനകള്‍ തേയിലത്തോട്ടത്തിലെ കടയില്‍ ആക്രമണം നടത്തുന്നത്.