ഇന്ത്യന്‍ വംശജരെ നാടുകടത്തുമെന്ന് ട്രംപ് ഭരണകൂടം അറിയിച്ചതായി സുഷമ സ്വരാജ്

ന്യൂഡല്‍ഹി: അമേരിക്കയില്‍ നിന്ന് 271 ഇന്ത്യന്‍ വംശജരെ നാടുകടത്തുമെന്ന് ട്രംപ് ഭരണകൂടം അറിയിച്ചതായി കേന്ദ്രമന്ത്രി സുഷമ സ്വരാജ്. അമേരിക്കയോട് നാടുകടത്തുന്നതിന് മുമ്പ് ഇവരെ കുറിച്ചുള്ള വിശദവിവരങ്ങള്‍ കൈമാറണമെന്ന് ഇന്ത്യന്‍ സര്‍ക്കാര്‍ ആവശ്യപ്പെട്ടിട്ടുണ്ട്. പാര്‍ലമെന്റിലെ ചോദ്യോത്തര വേളയിലാണ് മന്ത്രി ഇക്കാര്യം അറിയിച്ചത്.

ഇന്ത്യക്കാരാണ് ഇവരെന്ന് പരിശോധിക്കാന്‍ പട്ടികയിലുള്ളവരുടെ വിവരങ്ങള്‍ നല്‍കണമെന്നും അതിനുശേഷമേ നടപടിയിലേക്ക് കടക്കാവൂ എന്നും യുഎസിനെ അറിയിച്ചതായി സുഷമ പറഞ്ഞു. പക്ഷെ ഇതുവരെ യുഎസില്‍ നിന്ന് പ്രതികരണം ലഭിച്ചിട്ടില്ല. 2009- 2014 കാലഘട്ടത്തില്‍ അമേരിക്കയിലെ ഇന്ത്യന്‍ വംശജരുടെ എണ്ണത്തില്‍ അഞ്ചു ലക്ഷത്തോളം വര്‍ധനവാണ് ഉണ്ടായിരിക്കുന്നത്. യുഎസില്‍ ഇന്ത്യക്കാര്‍ക്കു നേരെ നിരവധി ആക്രമണങ്ങള്‍ അടുത്തകാലത്തായി നടന്നിരുന്നു.