കൊച്ചി: ദുരൂഹസാഹചര്യത്തില്‍ കൊച്ചി കായലില്‍ മരിച്ച നിലയില്‍ കണ്ടെത്തിയ സി.എ വിദ്യാര്‍ഥിനി മിഷേല്‍ ഷാജിക്ക്‌ കേസില്‍ അറസ്‌റ്റിലായ ക്രോണിന്‍ അലക്‌സാണ്ടറുമായി അടുത്ത ബന്ധമുണ്ടെന്നു തെളിയിക്കുന്ന ചിത്രങ്ങള്‍ പുറത്ത്. ക്രോണിന്റെ ഫോണില്‍നിന്നാണ്‌ കേസില്‍ നിര്‍ണായകമായ ഈ തെളിവുകള്‍ പോലീസിനു ലഭിച്ചത്‌.
അതേസമയം മിഷേലിന്റെ മരണം ആത്മഹത്യയാണെന്ന വാദം ശരിവയ്‌ക്കുന്ന കൂടുതല്‍ തെളിവുകളും പൊലീസിന് ലഭിച്ചു. കാമുകനായ ക്രോണിനുമായുള്ള പിണക്കം തന്നെയാണ് മിഷേൽ ജീവനൊടുക്കാൻ തീരുമാനിച്ചതിന് കാരണമെന്ന നിഗമനത്തിൽ തന്നെയാണ് പോലീസ് എത്തിച്ചേർന്നിരിക്കുന്നത്. മിഷേലിനെ കാണാതായ ഞായറാഴ്ച കാലത്ത് മുതൽ ക്രോണിൻ വിളിച്ച് വഴക്കുണ്ടാക്കുകയും നിരന്തരം മെസേജുകൾ അയയ്ക്കുകയും ചെയ്തിരുന്നു. മിഷേൽ ക്രോണിന്റെ ഫോൺ എടുക്കാത്തതിനെ തുടർന്ന് ക്രോണിന്‍ സ്വന്തം അമ്മയെ വിളിച്ച് മിഷേല്‍ ഫോണെടുക്കുന്നില്ലെന്നും ഇങ്ങനെ പോയാല്‍ താന്‍ ആത്മഹത്യ ചെയ്യുമെന്നും പറഞ്ഞു. തുടർന്ന് അമ്മ മിഷേലിനെ വിളിക്കുകയും മിഷേൽ തിരിച്ചുവിളിക്കുകയും ചെയ്തിട്ടുണ്ട്. വീണ്ടും വിളിച്ച ക്രോണിന്‍ നീ എന്നെ ഒഴിവാക്കുകയാണെന്നും അങ്ങനെ സംഭവിച്ചാല്‍ താന്‍ മരിക്കുമെന്നും പറഞ്ഞു. എന്നാല്‍ നീ മരിക്കണ്ട, ഞാന്‍ മരിക്കാം എന്ന് മിഷേൽ പറഞ്ഞു. തുടർന്ന് ഞാനൊരു തീരുമാനമെടുത്തിട്ടുണ്ട്, നീയത് തിങ്കളാഴ്ച അറിയുമെന്നും മിഷേൽ പറയുകയുണ്ടായി. ഇങ്ങനെ മാനസിക സമ്മര്‍ദത്തിനടിപ്പെട്ടാണ് മിഷേല്‍ മരണത്തിലേക്ക് നീങ്ങിയതെന്നാണ് ഉദ്യോഗസ്ഥരുടെ വിലയിരുത്തല്‍.
Post Your Comments