കൊല്ലം: ചടയമംഗലത്ത് മകളെ സ്‌കൂളിൽ കൊണ്ടാക്കിയ ശേഷം മടങ്ങി വന്ന ഗൾഫ് വ്യവസായിയെ ഒരു സംഘം ആൾക്കാർ തട്ടിക്കൊണ്ടുപോയതായി പരാതി.ചടയമംഗലം കരുന്തലക്കോട് പൊയ്കയില്‍ വീട്ടില്‍ ജഹാംഗീറിനെയാണ് (42) തട്ടിക്കൊണ്ടു പോയത്.മകളെ സ്‌കൂളിലാക്കിയ ശേഷം സുഹൃത്തിനൊപ്പം മടങ്ങവേ മാരുതി സ്വിഫ്റ്റിലെത്തിയ അഞ്ചുപേര്‍ കാര്‍ കുറുകെയിട്ട ശേഷം ജഹാംഗീറിനെ കടത്തി കൊണ്ടു പോകുകയായിരുന്നു എന്നാണ് ഭാര്യ സിതാര ബീഗത്തിന്റെ പരാതി. പരാതി അന്വേഷിച്ച പോലീസ് തട്ടിക്കൊണ്ടുപോയ വണ്ടി നമ്പർ വ്യാജമാണെന്ന് കണ്ടെത്തി.
രണ്ടുമാസം മുമ്പ് ജഹാംഗീറിനെ ഇതുപോലെ തന്നെ ചിലർ തട്ടിക്കൊണ്ടു പോയ ശേഷം വ്യാജ രേഖകളില്‍ ഒപ്പിടുവിച്ചിരുന്നു. എന്നാൽ ആ കേസിൽ പ്രതികളെ അറസ്റ്റ് ചെയ്തിരുന്നെങ്കിലും അന്വേഷണം ശരിയായ രീതിയിൽ അല്ലായിരുന്നു എന്ന് ഭാര്യ പരാതിപ്പെടുന്നു. ജഹാംഗീറിന്റെ മൊബൈൽ കാറിൽ തന്നെ ഉപേക്ഷിക്കപ്പെട്ട നിലയിലാണ്. ഗൾഫിലെ ബിസിനസ് സംബന്ധമായ എന്തെങ്കിലും ഇടപാടുകളായിരിക്കാം തട്ടിക്കൊണ്ടുപോകലിന് പിന്നിൽ എന്നാണു പോലീസിന്റെ നിഗമനം. അന്വേഷണം തുടരുന്നു.
Post Your Comments