നാട്ടിൽ അവധിയ്ക്ക് പോയ പ്രവാസി മലയാളി ഹൃദയാഘാതം മൂലം മരണമടഞ്ഞു

അൽകോബാർ•അവധിയ്ക്കായി കേരളത്തിലേയ്ക്ക് മടങ്ങിയ സൗദി പ്രവാസി, ഹൃദയാഘാതം മൂലം മരണമടഞ്ഞു.

മലപ്പുറം നിലമ്പൂർ ചുങ്കത്തറ കുറുമ്പാലമൂട് മഹലിൽ വീട്ടിൽ താമസക്കാരനായ അബൂബക്കർ മഹലിൽ (51 വയസ്സ്) ആണ് മരണമടഞ്ഞത്. പത്തുവർഷത്തിൽ ഏറെയായി സൗദിയിൽ പ്രവാസിയായിരുന്നു. അൽകോബാറിൽ വാഹനസ്പെയർപാർട്ട്സ് വിൽപന ജോലിയിൽ ഏർപ്പെട്ടിരുന്ന, അബൂബക്കർ ഒരാഴ്ച മുൻപാണ് അവധിയ്ക്കായി നാട്ടിലേയ്ക്ക് പോയത്. പെട്ടെന്നുണ്ടായ ഹൃദയാഘാതത്തെ തുടർന്ന് കുഴഞ്ഞു വീണ അബൂബക്കറിനെ ബന്ധുക്കൾ ആശുപത്രിയിൽ എത്തിച്ചെങ്കിലും, ജീവൻ രക്ഷിയ്ക്കാനായില്ല.

റസിയത്ത് ആണ് അബൂബക്കറിന്റെ ഭാര്യ. റിസ്‌വാൻ എന്ന മകനും, ജെസ്മി ബക്കർ, തെൻസി ബക്കർ, റംസി ബക്കർ എന്നീ പെൺകുട്ടികളും ഉണ്ട്.

നവയുഗം സാംസ്കാരികവേദിയുടെ തുക്ബ ബയോണിയ യൂണിറ്റിലെ പ്രവർത്തകനായിരുന്ന അബൂബക്കർ, സാമൂഹ്യ,സാംസ്കാരികപ്രവർത്തനങ്ങളിൽ സജീവമായി പങ്കെടുത്തിരുന്നു. അബൂബക്കറിന്റെ നിര്യാണത്തിൽ നവയുഗം സാംസ്കാരികവേദി കേന്ദ്രകമ്മിറ്റി അനുശോചനം രേഖപ്പെടുത്തി.