ചന്ദ്രനില്‍ നിങ്ങളുടെ പേര് എത്തിക്കാം; എങ്ങനെയെന്നല്ലേ?

ബംഗളുരുവിലെ ടിം ഇൻഡസ് എന്ന കമ്പനിയാണ് ഇത്തരമൊരു ഓഫർ മുന്നോട്ട് വച്ചിരിക്കുന്നത്. അടുത്ത വർഷം ആദ്യം കമ്പനി നടത്തുന്ന ചാന്ദ്ര പര്യവേഷണത്തിനുള്ള ഫണ്ട് സ്വരുക്കൂട്ടാൻ വേണ്ടിയാണ് ഇത്തരം ഒരു ഓഫർ ( ക്രൗഡ് ഫണ്ടിങ് ).

500 രൂപ നൽകുന്നവരുടെ പേര് അലുമിനിയം ഫലകത്തിൽ കൊത്തിവെയ്ക്കും. തുടർന്ന് ഈ ഫലകങ്ങൾ പര്യവേഷണത്തിന് അയക്കുന്ന പേടകത്തിനോടൊപ്പം ചന്ദ്രനിലേക്ക് അയക്കുമെന്നാണ് വാഗ്ദാനം. 14 ലക്ഷം പേരിൽ നിന്നുമായി 70 കോടി രൂപ സമാഹരിക്കാനാണ് കമ്പനി ലക്ഷ്യമിടുന്നത്. അടുത്ത മാസം മുതൽ പേര് ചന്ദ്രനിലേക്ക് അയക്കാനുള്ള ഈ ഓഫർ ആരംഭിക്കും.

2018 ജനുവരി 26 ന് ചന്ദ്രനിൽ ഇറങ്ങാൻ നിശ്ചയിച്ചിരിക്കുന്ന ദൗത്യം വിജയകരമായി പൂർത്തിയാക്കിയാൽ, ചാന്ദ്ര പര്യവേഷണം പൂർത്തിയാക്കുന്ന ലോകത്തിലെ ആദ്യ സ്വകാര്യ ഏജൻസിയായി ടീം ഇൻഡസ് കമ്പനി മാറും. ഐ.ഐ.ടി ഡൽഹിയിൽ നിന്നും പഠിച്ചിറങ്ങിയ ഒരുപറ്റം വിദ്യാർത്ഥികൾ ചേർന്നാണ് ടീം ഇൻഡസ് രൂപീകരിച്ചത്.