ക്രിക്കറ്റ് പിച്ചിലെ ഇത്തിരി കുഞ്ഞന്‍; വിസ്മയമായി അഞ്ചുവയസുകാരന്‍ (വീഡിയോ കാണാം)

ക്രിക്കറ്റിൽ അതിശയിപ്പിക്കുന്ന പ്രകടനം കാഴ്ച വച്ച് സോഷ്യൽ മീഡിയയിൽ താരമാകുകയാണ് 5 വയസുകാരനായ രുദ്ര. മിഠായിക്കും കളിപ്പാട്ടങ്ങൾക്കും വേണ്ടി വാശി പിടിക്കേണ്ട പ്രായത്തിൽ തന്നെക്കാൾ ഇരട്ടി പ്രായമുള്ളവരോട് മത്സരിക്കുകയാണ് ഈ കൊച്ചു മിടുക്കൻ. എറിയുന്ന പന്തുകളെ മിന്നൽ വേഗത്തിൽ സിക്സും ഫോറുമൊക്കെയാക്കി മാറ്റുന്ന പിച്ചിലെ ഈ ഇത്തിരി കുഞ്ഞൻ.

പണ്ട് 16 വയസുകാരനായ സച്ചിനെ കണ്ടതുപോലെ ഇന്ന് പലരും തെല്ലൊരു ഭയത്തോടും അതിലേറെ വിസ്മയത്തോടുമാണ് അണ്ടർ 14 ഡൽഹി ക്രിക്കറ്റിലെ രുദ്രപ്രതാപ് എന്ന അഞ്ച് വയസ്കാരനെയും നോക്കികാണുന്നത്. സ്റ്റംപിന്റെ മാത്രം നീളമുള്ള അവൻ ബാറ്റിങ്ങിലെ മിന്നും പ്രകടനം കൊണ്ട് എല്ലാവരെയും വിസ്മയിപ്പിക്കുകയാണ്. ഈ അഞ്ച് വയസ്കാരനാകും അടുത്ത സച്ചിൻ എന്ന് സോഷ്യൽമീഡിയ പറയുന്നു. അവന്റെ ഇരട്ടി നീളവും പ്രായവുമുള്ള ചുണക്കുട്ടന്മാരുമായാണ് രുദ്ര ഏറ്റുമുട്ടുന്നത്. യാതൊരു ആത്മവിശ്വാസക്കുറവും അവന് ഉണ്ടായിരുന്നില്ല എന്ന് കണ്ടുനിന്നവരെല്ലാം പറയുന്നു. ഇന്ന് ക്രിക്കറ്റിലെ പുതിയ താരോദയത്തെ നോക്കി കാണും പോലെ നിറയെ ആരാധകരാണ് രുദ്രയ്ക്ക് സോഷ്യൽ മീഡിയയിൽ. രുദ്രയുടെ വീഡിയോ യൂ ട്യൂബിൽ ഹിറ്റ് ചാർട്ടിൽ ഇടം നേടിയിരിക്കുകയാണ്.