യു എ ഇ ലോകത്തിന് നൽകുന്ന സന്ദേശം; ലോക സഹിഷ്ണുത ദിനത്തില്‍ ഷെയ്ഖ് മൊഹമ്മദ്‌

ദുബായ്: യു എ ഇ ലോകത്തിന് നൽകുന്നത് വിവേചനവും, അസഹിഷ്ണുതയും ഇല്ലാത്ത മനോഹരമായ നാടാണെന്ന് യു എ ഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മൊഹമ്മദ്‌ ബിന്‍ റാഷിദ് അല്‍ മക്തൂം പ്രഖ്യാപിച്ചു. ഈ മണ്ണിൽ ഭീകരതയും അക്രമവും ഇല്ല. നീതിയും സമാധാനവും എല്ലാവർക്കും ഉണ്ടാകും. കെട്ടിടങ്ങളുടെ ഉയരമോ നഗരവീഥികളുടെ വീതിയോ അല്ല അഭിമാനം പകരുന്നത്. മറിച്ച് നമ്മുടെ രാഷ്ട്രത്തിന്റെ സഹിഷ്ണുതയും തുറന്ന മനസുമാണെന്ന് അദ്ദേഹം പറഞ്ഞു. ലോക സഹിഷ്ണുത ദിനത്തിനു മുന്നോടിയായി ജനങ്ങളെ സംബോധന ചെയ്ത പുറത്തിറക്കിയ സന്ദേശത്തിലാണ് അദ്ദേഹം ഇക്കാര്യങ്ങൾ സൂചിപ്പിച്ചത്. ഏവരെയും തുല്യരായി കാണുന്നുവെന്ന യാഥ്യാർഥ്യത്തിൽ നിന്നാണ് യു എ ഇയുടെ അഭിമാനം നാമ്പെടുക്കുന്നതെന്നും അദ്ദേഹം കൂട്ടിച്ചേർത്തു.