ദുബായ് വേറെ ലെവൽ ! യാത്രക്കാരുടെ എണ്ണത്തില്‍ വീണ്ടും റെക്കോര്‍ഡിട്ട് ദുബായ് അന്താരാഷ്ട്ര വിമാനത്താവളം

ദുബായ് : യാത്രക്കാരുടെ എണ്ണത്തില്‍ വീണ്ടും റെക്കോര്‍ഡിട്ട് ദുബായ് അന്താരാഷ്ട്ര വിമാനത്താവളം. 2024-ൽ 92.3 ദശലക്ഷം യാത്രക്കാരെ സ്വാഗതം ചെയ്തുകൊണ്ട് ദുബായ് അന്താരാഷ്ട്ര വിമാനത്താവളം (DXB) 2018-ൽ സ്ഥാപിച്ച 89.1 ദശലക്ഷം എന്ന മുൻ റെക്കോർഡ് മറികടന്നു.

എയർപോർട്ട് കൗൺസിൽ ഇന്റർനാഷണലിന്റെ ലോകത്തിലെ ഏറ്റവും തിരക്കേറിയ അന്താരാഷ്ട്ര വിമാനത്താവളങ്ങളുടെ പട്ടികയിൽ ഒരു ദശാബ്ദക്കാലമായി DXB മുന്നിലാണ്. എമിറേറ്റ്സ് ന്യൂസ് ഏജൻസിയാണ് ഇക്കാര്യം റിപ്പോർട്ട് ചെയ്തത്.

2024-ൽ വർഷം മുഴുവനും സുസ്ഥിരമായ വളർച്ചയാണ് ദുബായ് ഇന്റർനാഷണൽ എയർപോർട്ട് കാഴ്ചവെച്ചത്. യാത്ര, ബിസിനസ്സ്, നിക്ഷേപം എന്നിവയ്ക്കുള്ള ആഗോള ലക്ഷ്യസ്ഥാനമെന്ന നിലയിൽ ദുബായുടെ ആകർഷണം ഇത് എടുത്തുകാണിക്കുന്നു. 2024 ഡിസംബറിൽ മാത്രം 8.2 ദശലക്ഷം അതിഥികൾ DXB വഴി യാത്ര ചെയ്തു.

ഈ വിജയത്തിന് കാരണം യുഎഇയുടെ നവീകരണത്തിനും മികവിനും വേണ്ടിയുള്ള നിരന്തരമായ പരിശ്രമമാണെന്ന് യു എ ഇ ഉപരാഷ്ട്രപതിയും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം ചൂണ്ടിക്കാട്ടി. ധീരമായ അഭിലാഷങ്ങളെ യാഥാർത്ഥ്യമാക്കി മാറ്റാനുള്ള രാജ്യത്തിന്റെ കഴിവിനെയാണ് ഇത്തരം നേട്ടങ്ങൾ പ്രതിഫലിപ്പിക്കുന്നതെന്ന് അദ്ദേഹം ഊന്നിപ്പറഞ്ഞു.

യാത്രക്കാർക്ക് തടസ്സമില്ലാത്തതും ലോകോത്തരവുമായ അനുഭവങ്ങൾ നൽകുന്നതിൽ വിമാനത്താവളത്തിന്റെ സഹകരണ ശ്രമങ്ങളെ ദുബായ് വിമാനത്താവത്തിന്റെ സി ഇ ഒ പോൾ ഗ്രിഫിത്ത്സ്, എടുത്തുകാട്ടി.