മൂവാറ്റുപുഴ: പെട്രോൾ പമ്പിൽ നിന്നും പെട്രോൾ അടിച്ച ശേഷം പണം നൽകാതെ മുങ്ങിയ സംഘത്തെ പോലീസ് പിടികൂടി. വാഹനവുമായി മുങ്ങിയ സംഘത്തെ മൂവാറ്റുപുഴ പോലീസാണ് അറസ്റ്റ് ചെയ്തത്. കോട്ടയം കൊരട്ടിക്കുന്ന് തിരുവഞ്ചിയൂര്‍ ചിറയില്‍ വീട്ടില്‍ അനി ജോസഫ് (36) മൂവാറ്റുപുഴ വെള്ളൂര്‍കുന്നം ചെരുവുകാലായില്‍ വീട്ടില്‍ സിജിമോന്‍ (41) ആനിക്കാട് പാലത്തിങ്കല്‍ അര്‍ഷാദ് (37)എന്നിവരെയാണ് മൂവാറ്റുപുഴ എസ്‌ഐ ജി.പി.മനുരാജിന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്.
38 ലിറ്റർ പെട്രോൾ വെള്ളൂര്‍കുന്നം എ.എം.എ.ഫ്യുവല്‍സ് പെട്രോള്‍ പമ്പില്‍ നിന്നും അടിച്ച ശേഷം പണം നല്‍കാതെ വാഹനം ഓടിച്ച് പോകുകയായിരുന്നു ഇവർ. ഇതേ തുടർന്ന് പമ്പ് ഉടമ വാഹനത്തിന്റെ നമ്പറും സിടിടിവി ദൃശ്യങ്ങളും അടക്കം പോലീസിന് നല്‍കുകയും, ഈ പരാതിയുടെ അടിസ്ഥാനത്തിൽ പോലീസ് നടത്തിയ അന്വേഷണത്തിലാണ് പ്രതികള്‍ പിടിയിലായത്. പ്രതികള്‍ ഇതിനുമുമ്പും സമാനമായ കേസുകളില്‍ പ്രതികളാണ്. മൂവാറ്റുപുഴ കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
Post Your Comments