ഒറ്റമൂലി പരീക്ഷണത്തിലൂടെ 21-ദിവസം പ്രായമായ കുഞ്ഞിന് കാഴ്ച നഷ്ടപ്പെട്ടു!

അന്ധവിശ്വാസങ്ങളുടെ ഫലമായി കേവലം 21 ദിവസം മാത്രം പ്രായമുള്ള കുഞ്ഞിന്റെ കാഴ്ച നഷ്ടപെട്ടു. കുഞ്ഞിന് ഈ ദൗർഭാഗ്യം ഉണ്ടായത് പഴമക്കാർ പറഞ്ഞ ഒറ്റമൂലി പരീക്ഷിച്ചതിനാലാണ്. കുഞ്ഞിൻെറ കണ്ണിലെ ചുവന്ന പാട് ശ്രദ്ധയിൽപ്പെട്ടതിനെത്തുടർന്നാണ് സീമ മുതിർന്നവരുടെ ഉപദേശം തേടിയത്. സാധാരണ ഗതിയിൽ പഴമക്കാര്‍ ഇതിനു പ്രതിവിധിയായി പറയുന്നത് കണ്ണിൽ ഒന്നോ രണ്ടോ തുള്ളി മുലപ്പാൽ ഒഴിക്കാനാണ്. ഈ ഉപദേശം സ്വീകരിച്ച സീമ കുഞ്ഞിൻെറ കണ്ണിൽ മുലപ്പാലൊഴിച്ചു.

എന്നാൽ മുലപ്പാൽ ഒഴിച്ച ശേഷം കുഞ്ഞിൻെറ കണ്ണ് ക്രമാതീതമായി വീർക്കാൻ തുടങ്ങി. നീരുവെച്ച കണ്ണുമായി ബുദ്ധിമുട്ടുന്ന കുഞ്ഞിനെ ആശുപത്രിയിൽ എത്തിച്ചപ്പോഴാണ് ആ അമ്മയും കുടുംബവും തങ്ങൾ ചെയ്തത് തെറ്റാണെന്ന് അറിയുന്നത്. അണുബാധയേറ്റ കണ്ണിൽ മുലപ്പാലൊഴിച്ചപ്പോൾ കുഞ്ഞിൻെറ കണ്ണിൻെറ കോർണിയയ്ക്ക് പഴുപ്പുബാധിച്ചു. അങ്ങനെ കാഴ്ചശക്തിക്കു വരെ തകരാർ സംഭവിച്ചു.