എമിറേറ്റ്സ് വിമാനദുരന്തം: തിരുവനന്തപുരം-ദുബായ് ഇന്‍ഡിഗോ വിമാനം റദ്ദാക്കി

തിരുവനന്തപുരം● ദുബായില്‍ എമിറേറ്റ്സ് വിമാനം ഇടിച്ചിറക്കുന്നതിനിടെ തീപ്പിടിച്ചതിനെത്തുടര്‍ന്ന് റണ്‍വേ അടച്ചതിനാല്‍ തിരുവനന്തപുരത്ത് നിന്ന് വൈകിട്ട് പുറപ്പെടേണ്ട ഇന്‍ഡിഗോ വിമാനം റദ്ദാക്കി. 6.20 ന് പുറപ്പെടേണ്ട 6E39 വിമാനം 7.30 പുറപ്പെടുമെന്ന് അറിയിച്ചിരുന്നുവെങ്കിലും പിന്നീട് റദ്ദാക്കുകയായിരുന്നു. ഇതെത്തുടര്‍ന്ന്‍ യാത്രക്കാര്‍ തിരുവനന്തപുരം അന്താരാഷ്ട്ര വിമാനത്താവളത്തില്‍ ബഹളം വയ്ക്കുകയാണ്.

രാവിലെ 10.25 ന് തിരുവനന്തപുരത്ത് നിന്ന് പോയ എമിറേറ്റ്സ് EK521 വിമാനം ദുബായില്‍ ഇറങ്ങുന്നതിനിടെ തീപ്പിടിക്കുകയായിരുന്നു. വിമാനം നിലത്തിറങ്ങിയ ഉടന്‍ യാത്രക്കാര്‍ എമര്‍ജന്‍സി വാതില്‍വഴി രക്ഷപ്പെട്ടതിനാല്‍ വന്‍ ദുരന്തം ഒഴിവാകുകയായിരുന്നു. ബോയിംഗ് 777-300 വിഭാഗത്തില്‍പ്പെട്ട വിമാനത്തില്‍ 282 പേരാണ് ഉണ്ടായിരുന്നത്.

അപകടത്തെത്തുടര്‍ന്ന് ദുബായ് അന്താരാഷ്ട്ര വിമാനത്താവളത്തി(ഡി.എക്സ്.ബി )ലേക്കുള്ള വിമാനങ്ങള്‍ ദുബായ് അല്‍ മക്തൂം (ഡി.ഡബ്ല്യൂ.സി) വിമാനത്താവളത്തിലേക്കും ഷാര്‍ജയിലെ വിമാനത്താവളത്തിലേക്കും തിരിച്ചുവിടുകയാണ്.