ഉത്തര്‍പ്രദേശ്: ഉത്തര്‍പ്രദേശിലെ മഥുരയില്‍ വിവാഹ സത്കാരത്തിനിടെ ഐസ്‌ക്രീമിനെ ചൊല്ലിയുണ്ടായ സംഘര്‍ഷത്തെ തുടര്‍ന്ന് വിവാഹം മുടങ്ങി. സംഘര്‍ഷത്തില്‍ മൂന്ന് പോലീസുകാര്‍ക്ക് പരുക്കേറ്റതായാണ് റിപ്പോര്‍ട്ട്. വിവാഹ സല്‍ക്കാരത്തില്‍ ഐസ്‌ക്രീം കുറഞ്ഞുപോയി എന്നതിനെച്ചൊല്ലിയായിരുന്നു പ്രശ്നങ്ങള്‍ക്ക് തുടക്കം.
മഥുരയിലെ മഹേഷ് നഗര്‍ കോളനിയിലായിരുന്നു സംഭവം. വരന്റെ കുടുംബക്കാരില്‍ ചിലര്‍ ഐസ്‌ക്രീം കുറഞ്ഞു എന്നു ഉയര്‍ത്തിക്കാട്ടി പ്രശ്നം ഉണ്ടാക്കുകയും ഇത് കൂട്ടത്തല്ലിന് വഴിമാറുകയായിരുന്നു.
സംഘര്‍ഷത്തെ തുടര്‍ന്ന് വരന്റെ വീട്ടുകാര്‍ പോലിസില്‍ പരാതി നല്‍കി. ഇതിന്റെ അടിസ്ഥാനത്തില്‍ പോലിസ് കേസെടുക്കുകയും വധുവിന്റെ കുടുംബത്തിലെ ഏഴുപേരെ അറസ്റ്റ് ചെയ്യുകയും ചെയ്തു. ഇതില്‍ രോഷാകുലരായ വധുവിന്റെ ബന്ധുക്കള്‍ പോലീസിനു നേരെ കല്ലെറിഞ്ഞു. കല്ലേറില്‍ മൂന്ന് പോലിസുകാര്‍ക്ക് പരുക്കേറ്റു. സംഘര്‍ഷത്തെ തുടര്‍ന്ന് വരന്റെ ബന്ധുക്കള്‍ വിവാഹത്തില്‍ നിന്ന് പിന്തിരിഞ്ഞു. എന്നാല്‍ ഇരുകൂട്ടര്‍ക്കുമെതിരെ പോലീസ് എഫ്.ഐ.ആര്‍ രജിസ്റ്റര്‍ ചെയ്തിട്ടുണ്ട്.
–
Post Your Comments