കാലിഫോര്‍ണിയ: ബഹിരാകാശ ഗവേഷണ രംഗത്ത് പുതു ചരിത്രമെഴുതി വിക്ഷേപണത്തിന് ഉപയോഗിച്ച റോക്കറ്റ് തിരിച്ചിറക്കിയ യുഎസ് സ്‌പേസ് കമ്പനിയുടെ പുതിയ ദൗത്യം പരാജയപ്പെട്ടു. ലാന്‍ഡിങ്ങിനിടെ പൊട്ടിത്തകര്‍ന്നത് സ്‌പേസ് എക്‌സ് കമ്പനിയുടെ ഫാല്‍ക്കണ്‍ 9 റോക്കറ്റാണ്. ജാസന്‍ മൂന്ന് എന്ന ഉപഗ്രഹത്തെ ഭ്രമണപഥത്തിലെത്തിച്ച ശേഷം തിരിച്ചിറങ്ങിയ റോക്കറ്റ് അല്‍പസമയത്തിനകം വന്‍സ്‌ഫോടനത്തോടെ കത്തിയമരുകയായിരുന്നു. ജാസന്‍ മൂന്ന് കാലാവസ്ഥാ നിരീക്ഷണം ലക്ഷ്യമിട്ടുള്ള യുഎസ് യൂറോപ്പ് സംയുക്ത സംരംഭമാണ്.
തിരിച്ചിറങ്ങിയ ഉടനെ റോക്കറ്റ് കത്തിയമരുന്നതിന്റെ വിഡിയോ പുറത്തുവിട്ടത് സ്‌പേസ് എക്‌സ് തലവന്‍ എലന്‍ മുസ്‌ക് തന്നെയാണ്. സംഭവം നടന്നത് ലാന്‍ഡിങ്ങിനായി കടലില്‍ സജ്ജമാക്കിയ ഡ്രോണ്‍ കപ്പലില്‍ റോക്കറ്റ് ഇറങ്ങിയ ഉടനെയായിരുന്നു. അപകടത്തിന് കാരണം തിരിച്ചിറങ്ങവെ റോക്കറ്റിന്റെ നാലു കാലുകളിലൊന്ന് തകര്‍ന്നതാണ്. തിരിച്ചിറങ്ങിയ റോക്കറ്റ് ഒരു വശത്തേക്ക് ചരിഞ്ഞുവീണാണ് കത്തിയമര്‍ന്നത്.
കഴിഞ്ഞ മാസം ഇതേ കമ്പനി വിക്ഷേപണത്തിന് ശേഷം റോക്കറ്റ് തിരിച്ചിറക്കാനുള്ള ദൗത്യത്തില്‍ വിജയം കൈവരിച്ചിരുന്നു. ദൗത്യം പൂര്‍ത്തിയാക്കിയശേഷം തിരിച്ചിറങ്ങിയത് ഫ്‌ളോറിഡയിലെ കേപ് കാനവെറലില്‍ നിന്ന് 11 ഉപഗ്രഹങ്ങളുമായി കുതിച്ചുയര്‍ന്ന ഫാല്‍ക്കണ്‍ 9 എന്ന റോക്കറ്റാണ്. വന്‍ചെലവു വരുന്ന ബഹിരാകാശ ഗവേഷണത്തില്‍ ചെലവു കുറയ്ക്കാന്‍ ഈ നേട്ടം വഴിയൊരുക്കുമായിരുന്നു. ഇതിന്റെ ഏറ്റവും വലിയ മേന്‍മ ഒരേ റോക്കറ്റ് തന്നെ പലതവണ ഉപയോഗിക്കുന്നതിലൂടെ ചെലവു കുറയ്ക്കാമെന്നതാണ്.
Post Your Comments