പ്രായപൂർത്തിയാകാത്ത പെൺകുട്ടിയെ ഫെയ്സ്ബുക്ക് വഴി പരിചയപ്പെട്ട് ഒരാഴ്ച കൂടെതാമസിപ്പിച്ചശേഷം കൊലപ്പെടുത്താൻ ശമം

വെള്ളറട: പ്രായപൂർത്തിയാകാത്ത പെൺകുട്ടിയെ ഫെയ്സ്ബുക്ക് വഴി പരിചയപ്പെട്ട് ഒരാഴ്ച കൂടെതാമസിപ്പിച്ചശേഷം കൊലപ്പെടുത്താൻ ശ്രമം. പ്രതിയെ പോലീസ് അറസ്റ്റ് ചെയ്തു. പാലക്കാട് സ്വദേശിനിയായ പെൺകുട്ടിയെ ആണ് ഓട്ടോ ഡ്രൈവറായ മൈലച്ചൽ വലിയറക്കോണംവീട്ടിൽ മനോജ്(23) കൊല്ലാന്‍ ശ്രമിച്ചത്. തുടര്‍ന്നാണ്‌ ഇയാളെ  പോലീസ് അറസ്റ്റ് ചെയ്തത്. വിവാഹം കഴിക്കാമെന്നു പ്രലോഭിപ്പിച്ചു പ്രായപൂർത്തിയാകാത്ത പെൺകുട്ടിയെ മനോജ് 21നു വിളിച്ചുവരുത്തുകയായിരുന്നു.

ഫേസ് ബുക്ക് വഴിയാണ് പെൺകുട്ടിയെ ഇയാൾ പരിചയപ്പെട്ടത്. ഒരാഴ്ച കൂടെ താമസിപ്പിച്ച ശേഷം പ്രായപൂർത്തിയാകാത്ത പെൺകുട്ടി കൂടെ താമസിച്ചാൽ പൊലീസ് പിടിക്കുമെന്നു പറഞ്ഞ് 27നു പെൺകുട്ടിയെ തിരിച്ചയച്ചു. എന്നാൽ, സ്വീകരിക്കാൻ വീട്ടുകാർ തയാറാകാത്തതിനെത്തുടർന്ന് പെൺകുട്ടി തിരിച്ചെത്തി. തുടർന്ന് ഇയാൾ പെൺകുട്ടിയെ കഴുത്തിൽ ഷാൾ മുറുക്കി കൊല്ലാൻ ശ്രമിക്കുന്നതിനിടെ നിലവിളി കേട്ട് നാട്ടുകാർ ഇടപെട്ടു പൊലീസിൽ വിവരമറിയിക്കുകയായിരുന്നു.

മനോജിനു നാട്ടിൽ മറ്റു രണ്ടു പെൺകുട്ടികളുമായി അടുപ്പമുണ്ടെന്നു പൊലീസ് പറഞ്ഞു. പ്രതിയുടെ ഓട്ടോറിക്ഷയും ബൈക്കും പോലീസ് കസ്റ്റഡിയിലെടുത്തു.