‘മാറ് തുറക്കല്‍ സമര’വുമായി വനിതാ ആക്ടിവിസ്റ്റുകള്‍ : ചിത്രങ്ങള്‍ പോസ്റ്റ്‌ ചെയ്തു

കൊച്ചി•ഫാറൂഖ് കോളേജ് അധ്യാപകന്റെ ‘വത്തങ്ങ’ പരാമര്‍ശത്തിനെതിരെ സോഷ്യല്‍ മീഡിയയില്‍ പ്രതിഷേധം ശക്തമാകുന്നതിനിടെ ഒരു കൂട്ടം വനിതാ ആക്ടിവിസ്റ്റുകള്‍ ‘മാറ് തുറക്കല്‍ സമര’വുമായി രംഗത്തെത്തി. #മാറ്തുറക്കല്‍സമരം എന്ന ഹാഷ് ടാഗില്‍ വത്തങ്ങ കൊണ്ട് മാറിടം മറച്ചും, മാറിടം തുടര്‍ന്ന് കാട്ടിയുമുള്ള ചിത്രങ്ങള്‍ സാമൂഹ്യമാധ്യമങ്ങളില്‍ പോസ്റ്റ്‌ ചെയ്താണ് പ്രതിഷേധം.

ഇതിന്റെ ഭാഗമായി രഹാന ഫാത്തിമയുടെ ചിത്രങ്ങള്‍ പോസ്റ്റ്‌ ചെയ്തുകൊണ്ട് ദിയ സിന ഫേസ്ബുക്കില്‍ കുറിച്ചത് ഇങ്ങനെ.

#മാറുതുറക്കൽസമരം….

പലരും പറയുന്ന പോലെ ‘മാറു തുറക്കൽ സമരം ‘ ,പഴയ ‘മാറു മറയ്ക്കാനുള്ള അവകാശ’ പോരാട്ടത്തെ റദ്ദുചെയ്യുന്നു എന്നൊരഭിപ്രായം എനിക്കില്ല .പകരം അത് പഴയ പോരാട്ടങ്ങളുടെ തുടർച്ച മാത്രമാണെന്ന് ഞാൻ വിശ്വസിക്കുന്നു .

അധികാര പ്രമത്തതയുടെ ബാഹ്യലോകത്തു നിന്ന് ആൺ- വരേണ്യബോധം പെൺ – ദളിത് അപകർഷതയെ ന്യൂനീകരിച്ചതിന്റെ ബഹിർസ്ഫുരണമായിരുന്നു മാറുമറയ്ക്കൽ സമരം .പെണ്ണിന്റെ “ചോയ്സ് ” പ്രാചീനആൺഹുങ്കുകൾ വകവെച്ചു കൊടുക്കാതിരുന്നതിന്റെ അധികാരതുടർച്ചയിൽ ക്യൂവിലാണ് ഇന്നും നവീന ആൺമത ശരീരങ്ങൾ എന്നു തോന്നുന്നു .ഈയൊരു സമരരീതിയോടെ സ്ത്രീകൾ മുഴുവൻ മാറുതുറന്ന് നടക്കണമെന്നോ നടക്കുമോയെന്നുമല്ല അർത്ഥമാക്കേണ്ടത്. മറിച്ച് അവർക്ക് അതിനുള്ള അധികാരമുണ്ടെന്ന് രേഖപ്പെടുത്തുക മാത്രമാണ് .

പൊതു ഇടങ്ങളിൽ ആൺ ശരീരം അനുഭവിക്കുന്ന സ്വാതന്ത്ര്യത്തിന്റെ അതേ അളവിൽ ,അതല്ലെങ്കിൽ ആൺ ശരീരത്തിന്റെ തുറന്നു കാട്ടപ്പെടലിന്റെ അതേ സ്വാതന്ത്യ ബോധം പെണ്ണിനും ബാധകമാണ്.
ആണിന്റെ ഉദാരതയിൽ മാത്രം അവളുടെ സ്വാതന്ത്ര്യത്തെ നിർവചിക്കാൻ ശ്രമിക്കുമ്പോഴാണ് പ്രശ്നം . പുറംകാഴ്ചയുടെ സങ്കുചിത ലൈംഗികബോധത്തിനപ്പുറത്ത് പെൺശരീരത്തിന്റെ ‘അത്ഭുത’ങ്ങളിൽ നിന്ന് മനുഷ്യശരീരത്തിലേക്കുള്ള പരിണാമം അനിവാര്യമായി തീർന്നിരിക്കുന്ന ഒരു കാലത്ത് , അങ്ങനെയൊരു പരിഷ്കരണത്തിലേക്ക് വിപ്ലവച്ചൂട്ട് ഉയർത്തിപ്പിടിക്കുകയാണ് ഇത്തരമൊരു സമരമാർഗത്തിലൂടെ !

(കടപ്പാട് Satish P Babu Rehana Fathima Pyarijaan Sulaiman)