മുംബൈ: ഐ എസ് എല്ലില്‍ കേരള ബ്ലാസ്റ്റേഴ്‌സിന് വീണ്ടും വിജയം. മുംബൈയ്ക്ക് എതിരെയുള്ള മത്സരത്തില്‍ സൂപ്പര്‍ സ്‌ട്രൈക്കര്‍ ഇയാന്‍ ഹ്യൂമാണ് കേരള ബ്ലാസ്റ്റേഴ്‌സിനായി വിജയ ഗോള്‍ നേടിയത്. 24-ാം മിനിറ്റിലായിരുന്നു ഹ്യൂമിന്റെ തകര്‍പ്പന്‍ ഗോള്‍. ബ്ലാസ്റ്റേഴ്‌സ് താരം മാര്‍കോസ് സിഫ്‌നിയോസിനെ ഫൗള്‍ ചെയ്തതിന് കേരളത്തിന് ലഭിച്ച കിക്കിലൂടെയാണ് ഗോള്‍ പിറന്നത്.
കിക്ക് എടുത്ത കറേജ് പക്കൂസ് ഹ്യൂമിന് പന്ത് നല്‍കുകയായിരുന്നു. മുംബൈ താരങ്ങള്‍ക്ക് പ്രതിരോധിക്കാനുള്ള അവസരം നല്‍കാതെ ഹ്യൂം ബ്ലാസ്റ്റേഴ്‌സിന്റെ വിജയഗോള്‍ നേടി. മുംബൈ കളിക്കാര്‍ ഓഫ്‌സൈഡ് അടക്കമുള്ള വാദങ്ങള്‍ നിരത്തിയെങ്കിലും റഫറി അംഗീകരിച്ചില്ല.
രണ്ടാം പകുതിയില്‍ സിഫ്‌നിയോസിനെ പിന്‍വലിച്ച് മലയാളി താരം സി കെ വിനീതിനെ കളത്തിലിറക്കി. പത്ത് മത്സരങ്ങളില്‍ നിന്ന് 14 പോയിന്റുമായി ബ്ലാസ്റ്റേഴ്‌സ് ആറാം സ്ഥാനത്തേക്ക് ഉയര്‍ന്നു. ഇത്രയും മത്സരങ്ങളില്‍ നിന്ന് 14 പോയിന്റുള്ള മുംബൈ അഞ്ചാം സ്ഥാനത്താണ്.
Post Your Comments