സംസ്ഥാനത്ത് ഇന്ന് റെക്കോർഡുകൾ ഭേദിച്ച് സ്വർണവില! ചരിത്രത്തിലെ ഏറ്റവും ഉയർന്ന നിരക്ക്

സംസ്ഥാനത്ത് ഇന്ന് റെക്കോർഡ് ഭേദിച്ച് സ്വർണവില കുതിച്ചുയർന്നു. ഒരു പവൻ സ്വർണത്തിന് ഇന്ന് ഒറ്റയടിക്ക് 480 രൂപയാണ് ഉയർന്നത്. ഇതോടെ, ഒരു പവൻ സ്വർണത്തിന്റെ ഇന്നത്തെ വിപണി വില 45,920 രൂപയായി. ഒരു ഗ്രാം സ്വർണത്തിന് 60 രൂപ വർദ്ധിച്ച് 5,740 രൂപ നിരക്കിലാണ് ഇന്ന് വ്യാപാരം നടക്കുന്നത്. ചരിത്രത്തിലെ തന്നെ ഏറ്റവും ഉയർന്ന നിരക്കിലാണ് ഇന്ന് സ്വർണവില ഉള്ളത്. ഇന്നലെ സ്വർണവിലയിൽ മാറ്റങ്ങൾ രേഖപ്പെടുത്തിയിരുന്നില്ല. ഒരു പവൻ സ്വർണത്തിന് 45,440 രൂപയും, ഗ്രാമിന് 5,680 രൂപയുമായിരുന്നു ഇന്നലെയുളള നിരക്ക്.

ആഗോള വിപണിയിൽ നിർണായക നിലവാരമായ 2,000 ഡോളർ മറികടന്നാണ് സ്വർണവില കുതിക്കുന്നത്. ട്രോയ് ഔൺസിന് 21.86 ഡോളർ ഉയർന്ന് 2,006.33 ഡോളർ എന്നതാണ് ഇപ്പോഴുള്ള നിലവാരം. ആഗോള തലത്തിൽ സ്വർണവില ഇത്തരത്തിൽ ഉയർന്നു നിന്നാൽ, വരും ദിവസങ്ങളിലും വർദ്ധനവ് പ്രതീക്ഷിക്കാവുന്നതാണ്. അന്താരാഷ്ട്ര വിപണിയിൽ ഇസ്രായേൽ-ഹമാസ് യുദ്ധ പ്രതിസന്ധി നിലനിൽക്കുന്നതിനെ തുടർന്നാണ് സ്വർണവില കത്തിക്കയറുന്നത്.

Also Read: മലപ്പുറത്ത് വൈദ്യുതാഘാതമേറ്റ് വി​ദ്യാ​ര്‍​ത്ഥി മ​രി​ച്ചു

കഴിഞ്ഞ മെയിലാണ് സംസ്ഥാനത്തെ സ്വർണവില ഇതിനു മുൻപ് ചരിത്രത്തിലെ ഉയർന്ന നിലയിൽ എത്തിയത്. മെയ് അഞ്ചിന് രേഖപ്പെടുത്തിയ ഒരു പവന് 45,760 രൂപ, ഒരു ഗ്രാമിന് 5,750 രൂപ എന്നതാണ് ചരിത്രത്തിലെ രണ്ടാമത്തെ ഉയർന്ന വിലനിലവാരമായി ഇപ്പോൾ മാറിയിരിക്കുന്നത്. അതേസമയം, സംസ്ഥാനത്ത് ഇന്ന് വെള്ളി വിലയിൽ മാറ്റമില്ല. ഒരു ഗ്രാം വെള്ളിക്ക് 77.50 രൂപ നിരക്കിലും, 8 ഗ്രാം വെള്ളിക്ക് 620 രൂപ നിരക്കിലുമാണ് ഇന്ന് വ്യാപാരം പുരോഗമിക്കുന്നത്.