ബലൂചിസ്ഥാനിലെ ഇരട്ട ചാവേർ സ്ഫോടനം; പിന്നിൽ ഇന്ത്യയുടെ ചാരസംഘടനയാണെന്ന ആരോപണവുമായി പാകിസ്ഥാൻ

ലാഹോർ: വെള്ളിയാഴ്ച ബലൂചിസ്ഥാനിലെ മസ്‌തുങ് ജില്ലയിലെ ഒരു പള്ളിക്ക് സമീപം നടന്ന രണ്ട് ചാവേർ സ്‌ഫോടനങ്ങളിൽ ഇന്ത്യയുടെ രഹസ്യാന്വേഷണ ഏജൻസിക്ക് പങ്കുണ്ടെന്ന ആരോപണവുമായി പാകിസ്ഥാൻ രംഗത്ത്. സ്‌ഫോടനത്തിൽ 65 പേരാണ് കൊല്ലപ്പെട്ടത്. നിരവധി ആളുകൾക്ക് പരിക്കേറ്റു. പരിക്കേറ്റവർ ചികിത്സയിലാണ്. മുഹമ്മദ് നബിയുടെ ജന്മദിനത്തോടനുബന്ധിച്ചുള്ള ഘോഷയാത്ര നടത്തുന്നതിനായി പള്ളിയിൽ തടിച്ചുകൂടിയ ആളുകൾക്ക് നേരെയായിരുന്നു സ്ഫോടനം നടന്നത്.

മണിക്കൂറുകൾക്ക് ശേഷം, ഖൈബർ പഖ്തൂൺഖ്വയിലെ ഹംഗു നഗരത്തിലെ ഒരു പള്ളിയിൽ മറ്റൊരു സ്ഫോടനം നടന്നു. ഇവിടെ 5 പേർ കൊല്ലപ്പെട്ടു. ചാവേർ ആക്രമണത്തിൽ ഇന്ത്യയുടെ റിസർച്ച് ആൻഡ് അനാലിസിസ് വിംഗിന് (റോ) പങ്കുണ്ടെന്ന് പാകിസ്ഥാൻ ആഭ്യന്തര മന്ത്രി സർഫറാസ് ബുഗ്തി അവകാശപ്പെട്ടു. ബലൂചിസ്ഥാന്റെ തലസ്ഥാനമായ ക്വറ്റയിൽ മാധ്യമങ്ങളോട് സംസാരിക്കുകയായിരുന്നു ബുഗ്തി.

‘സിവിൽ, മിലിട്ടറി, മറ്റ് എല്ലാ സ്ഥാപനങ്ങളും സംയുക്തമായി മസ്തുങ് ചാവേർ ബോംബിംഗിൽ ഉൾപ്പെട്ട ഘടകങ്ങൾക്കെതിരെ സമരം ചെയ്യും. ചാവേർ ആക്രമണത്തിൽ റോ-യ്ക്ക് പങ്കുണ്ട്’, പാകിസ്ഥാൻ മന്ത്രി പറഞ്ഞു.

ചാവേർ ബോംബ് ആക്രമണകാരിയുടെ ഡിഎൻഎ വിശകലനം ചെയ്യാൻ അയച്ചതായി പൊലീസ് ശനിയാഴ്ച അന്വേഷണ റിപ്പോർട്ട് സമർപ്പിച്ചു. ബലൂചിസ്ഥാനിലെ മദീന മസ്ജിദിന് സമീപം മസ്തുങ് എന്ന സ്ഥലത്ത് നടന്ന ഭീകരമായ ചാവേർ സ്ഫോടനത്തിൽ 60 പേർ കൊല്ലപ്പെടുകയും 60 ലധികം പേർക്ക് പരിക്കേൽക്കുകയും ചെയ്തു. ഖൈബർ പഖ്തൂൺഖ്വയിലെ ഹാംഗുവിൽ ഒരു പോലീസ് സ്റ്റേഷന്റെ പള്ളി ലക്ഷ്യമാക്കി നടന്ന രണ്ടാമത്തെ ബോംബ് ആക്രമണത്തിൽ, പള്ളിയുടെ മേൽക്കൂര തകർന്ന് അഞ്ച് പേർ കൊല്ലപ്പെടുകയും 12 പേർക്ക് പരിക്കേൽക്കുകയും ചെയ്തു.

അജ്ഞാതനായ അക്രമിക്കെതിരെ കൊലക്കുറ്റങ്ങളും തീവ്രവാദ കുറ്റങ്ങളും അടങ്ങിയ എഫ്‌ഐആർ ഫയൽ ചെയ്തതായി തീവ്രവാദ വിരുദ്ധ വകുപ്പിന്റെ (സിടിഡി) പ്രസ്താവന ഉദ്ധരിച്ച് ഡോൺ റിപ്പോർട്ട് ചെയ്തു. ആക്രമണത്തിന്റെ ഉത്തരവാദിത്തം ഇതുവരെ ഒരു ഗ്രൂപ്പും ഏറ്റെടുത്തിട്ടില്ല, പാകിസ്ഥാനിലെ ഏറ്റവും രക്തരൂക്ഷിതമായ ആക്രമണങ്ങൾക്ക് ഉത്തരവാദികളായ നിരോധിത തെഹ്‌രീക്-ഇ-താലിബാൻ പാകിസ്ഥാൻ (ടിടിപി) ഈ ആക്രമണത്തിൽ തങ്ങൾക്ക് പങ്കില്ലെന്ന് വാദിച്ചു. ആക്രമണത്തിന്റെ പശ്ചാത്തലത്തിൽ ബലൂചിസ്ഥാനിലെ കാവൽ സർക്കാർ മൂന്ന് ദിവസത്തെ ദുഃഖാചരണം പ്രഖ്യാപിച്ചു.