യുപിഐ ഉപയോഗിച്ച് കോണ്ടം വാങ്ങിയ വിവരങ്ങൾ സഹായകമായി : യുവതിയെ കൊന്ന് കത്തിച്ച പ്രതിയെ കുടുക്കി തെലങ്കാന പോലീസ്

ഹൈദരാബാദ്: തെലങ്കാനയിലെ മെഡ്ചാലിൽ തിരിച്ചറിയാൻ കഴിയാത്ത വിധം കത്തിക്കരിഞ്ഞ നിലയിൽ കണ്ടെത്തിയ 30 കാരിയുടെ കൊലപാതക കേസ് തെളിയിച്ച് തെലങ്കാന പോലീസ്. പ്രതിയായ 47 കാരനെ കഴിഞ്ഞ ദിവസം ഷാമിർപേട്ടിൽ നിന്ന് അറസ്റ്റ് ചെയ്തു. മുനീറാബാദിലെ ഒരു ഫാർമസ്യൂട്ടിക്കൽ ഷോപ്പിൽ നിന്ന് പ്രതി കോണ്ടം വാങ്ങിയിരുന്നു. പണമടയ്ക്കാൻ ഇയാൾ യുപിഐ ആപ്പ് ഉപയോഗിച്ചിരുന്നു. ഈ ഇടപാട് സമയത്തിന്റെ അടിസ്ഥാനത്തിലാണ് പോലീസ് പ്രതിയെ കണ്ടെത്തിയത്.

ഷാമിർപേട്ടിനടുത്തുള്ള മജീദ്പൂർ ഗ്രാമത്തിലെ താമസക്കാരനായ ഷെയ്ക്ക് ഇമാമാണ് പ്രതിയെന്ന് ഡിസിപി മെഡ്ചാൽ എൻ കോട്ടി റെഡ്ഡി മാധ്യമങ്ങളോട് പറഞ്ഞു. പോലീസ് കേസ് എങ്ങനെ തെളിയിച്ചുവെന്നും അദ്ദേഹം വിശദീകരിച്ചു. ജനുവരി 24 ന്, ഔട്ടർ റിംഗ് റോഡിലെ ഒരു കൽവെർട്ടിന് സമീപം പകുതി കത്തിയ നിലയിൽ ഒരു സ്ത്രീയുടെ മൃതദേഹം കണ്ടതായി മെഡ്ചൽ പോലീസിന് വിവരം ലഭിച്ചു. പ്രാഥമിക അന്വേഷണത്തിൽ സ്ത്രീയുടെ തല തകർന്ന നിലയിലായിരുന്നു തീയിട്ടതെന്ന് കണ്ടെത്തി.

മൃതദേഹം പോസ്റ്റ്‌മോർട്ടത്തിനായി മാറ്റി. ക്രൂരമായ ആക്രമണത്തിൽ മുഖം വികൃതമായിരുന്നതിനാൽ മരിച്ചയാളെ തിരിച്ചറിയാൻ കഴിഞ്ഞില്ല. രണ്ട് കൈകളിലും പച്ചകുത്തിയ രണ്ട് പേരുകൾ കണ്ടെത്തി. അവ ഇംഗ്ലീഷിലും തെലുങ്കിലുമായിരുന്നു. ഇത് സ്ത്രീയെ തിരിച്ചറിയാൻ സഹായിച്ചെന്ന് അന്വേഷണവുമായി ബന്ധപ്പെട്ട പോലീസ് ഉദ്യോഗസ്ഥൻ പറഞ്ഞു. അവരുടെ ഫോട്ടോകളുടെ അടിസ്ഥാനത്തിൽ നിസാമാബാദിലെ കുടുംബാംഗങ്ങളുമായി ബന്ധപ്പെടാൻ പോലീസിന് കഴിഞ്ഞു, അവർ മരിച്ച സ്ത്രീയെ തിരിച്ചറിഞ്ഞു. ഒരു വഴക്കിനെ തുടർന്ന് ഭർത്താവിനെ ഉപേക്ഷിച്ചതിന് ശേഷം കുഷൈഗുഡയിൽ കുറച്ചുനാളായി ഒറ്റയ്ക്ക് താമസിച്ചിരുന്ന സ്ത്രീയാണ് മരിച്ചതെന്ന് പോലീസ് പറഞ്ഞു.

പ്രദേശത്ത് ഒരു വീട്ടുജോലിക്കാരിയായി ജോലി ചെയ്താണ് അവർ ഉപജീവനമാർഗ്ഗം കണ്ടെത്തിയത്. തുടർന്ന് അവരെ അവസാനമായി കണ്ട സ്ഥലത്തെ സിസിടിവി ദൃശ്യങ്ങൾ പരിശോധിക്കാൻ തുടങ്ങി. കൊല്ലപ്പെട്ട ദിവസം മെഡ്ചലിൽ ബസ് കാത്തുനിൽക്കുകയായിരുന്നു അവർ എന്ന് പോലീസ് കണ്ടെത്തി. പിന്നീട് പ്രതിയായ ഇമാമുമായി സ്ത്രീ സംസാരിക്കുന്നത് കണ്ടു. പിന്നീട് പ്രതി സമീപത്തുള്ള ഒരു ഫാർമസ്യൂട്ടിക്കൽ ഷോപ്പിലേക്ക് പോകുന്നതായി കണ്ടു. അയാൾ എന്തോ വാങ്ങുകയും അതിന് പണം തന്റെ യുപിഐ ഉപയോഗിച്ച് നൽകുകയും ചെയ്തു.

പിന്നീട് സ്ത്രീയോടൊപ്പം ബൈക്കിൽ കൊണ്ടുപോകുകയും ചെയ്തു. ഷോപ്പിൽ അന്വേഷിച്ചപ്പോഴാണ് പ്രതി ഒരു പാക്കറ്റ് കോണ്ടമാണ് വാങ്ങിയതെന്ന് മനസിലാക്കാൻ സാധിച്ചത്. തുടർന്ന് ഈ വിവരങ്ങളുടെ അടിസ്ഥാനത്തിലാണ് പ്രതിയെ കണ്ടെത്തി അറസ്റ്റ് ചെയ്തതെന്ന് ഉദ്യോഗസ്ഥൻ കൂട്ടിച്ചേർത്തു. അന്വേഷണത്തിൽ ഇമാം സ്ത്രീയെ ആളൊഴിഞ്ഞ സ്ഥലത്തേക്ക് കൊണ്ടുപോയി മർദ്ദിച്ച ശേഷം തീകൊളുത്തി എന്നാണ് റിപ്പോർട്ട്. അതേ സമയം അറസ്റ്റ് ചെയ്തയാളെ തിങ്കളാഴ്ച ജുഡീഷ്യൽ കസ്റ്റഡിയിൽ വിടുകയും ചെയ്തു.