വീണ്ടും ജോലി സമ്മർദ്ദം മൂലം മരണം? യുവതി ഓഫീസിലെ കസേരയിൽ നിന്ന് വീണ് മരിച്ചു, ജോലി സമ്മർദ്ദം മൂലമെന്ന് സഹപ്രവർത്തകർ

ജോലി സമ്മർദത്തെ തുടർന്ന് പൂനെ ജീവനക്കാരി മരിച്ച സംഭവം വലിയ വിവാദമായിരുന്നു. ഇത് സർക്കാരിൻ്റെ ശ്രദ്ധയിൽപ്പെട്ടതിന് പിന്നാലെ ലഖ്‌നൗവിലെ ഒരു യുവതി ഓഫീസിലെ കസേരയിൽ നിന്ന് വീണ് മരിച്ചെന്ന വാർത്തയാണ് പുറത്ത് വരുന്നത്. യുവതി മരിച്ചത് ജോലി സമ്മർദത്തിനാലാണെന്ന് സഹപ്രവർത്തകർ ദൈനിക് ഭാസ്‌കറിനോട് പറഞ്ഞു.

ചൊവ്വാഴ്ചയാണ് സംഭവം നടന്നത്, എച്ച്‌ഡിഎഫ്‌സി ബാങ്കിൽ ജോലി ചെയ്തിരുന്ന സദഫ് ഫാത്തിമയാണ് മരിച്ച യുവതി. ഗോമതിനഗറിലെ എച്ച്‌ഡിഎഫ്‌സി ബാങ്കിൻ്റെ വിബൂതി ഖണ്ഡ് ശാഖയിൽ അഡീഷണൽ ഡെപ്യൂട്ടി വൈസ് പ്രസിഡൻ്റായി അവർ നിയമിക്കപ്പെട്ടതായി പ്രസിദ്ധീകരണത്തോടൊപ്പമുള്ള റിപ്പോർട്ടിൽ പറയുന്നു.

സെപ്തംബർ 24 ന് ഓഫീസിൽ ജോലി ചെയ്യുന്നതിനിടെ സദഫ് കസേരയിൽ നിന്ന് പെട്ടെന്ന് വീഴുകയായിരുന്നു. ഉടൻ തന്നെ ആശുപത്രിയിൽ എത്തിച്ചെങ്കിലും മരണം സ്ഥിരീകരിച്ചു. അവരുടെ മൃതദേഹം പിന്നീട് പോസ്റ്റ്‌മോർട്ടത്തിന് അയച്ചു എന്നും റിപ്പോർട്ടിൽ പറയുന്നു. സംഭവത്തിൽ പ്രതിഷേധവുമായി സമാജ്‌വാദി പാർട്ടി നേതാവ് അഖിലേഷ് യാദവ് രംഗത്തെത്തി. ഇപ്പോഴത്തെ സാഹചര്യം ഉത്കണ്ഠാജനകമാണ് എന്നും ഇത് രാജ്യത്തെ നിലവിലെ സാമ്പത്തിക സമ്മർദ്ദത്തിൻ്റെ പ്രതീകമാണ് എന്നും അഖിലേഷ് പറഞ്ഞു.രാജ്യത്തിൻ്റെ സാമ്പത്തിക നയങ്ങൾ പരാജയപ്പെട്ടുവെന്ന് ബിജെപിക്കെതിരെ അഖിലേഷ് ആഞ്ഞടിച്ചു.

നേരത്തെ, ഈ വർഷം ജൂലൈയിൽ, പൂനെയിലെ ഒരു സ്ഥാപനമായ ഏണസ്റ്റ് & യങ്ങിൽ (EY) ചേർന്ന് വെറും നാല് മാസത്തിനുള്ളിൽ, 26 കാരിയായ അന്ന സെബാസ്റ്റ്യൻ പേരയിൽ എന്ന മലയാളി വനിതാ ചാർട്ടേഡ് അക്കൗണ്ടൻ്റ് ജോലി സമ്മർദ്ദം മൂലം മരിച്ചു. അന്നയുടെ മരണത്തെത്തുടർന്ന്, സെബാസ്റ്റ്യൻ്റെ അമ്മ സെപ്തംബറിൽ, ഇ വൈ ഇന്ത്യ ചെയർമാൻ രാജീവ് മേമനിക്ക് കത്തെഴുതിയിരുന്നു, ജോലിഭാരവും ജോലിസമയവും തൻ്റെ മകളെ ബാധിച്ചുവെന്ന് അവർ കത്തിൽ ആരോപിച്ചു. എന്നാൽ, കമ്പനി ഈ ആരോപണങ്ങൾ നിഷേധിച്ചു. തുടർന്ന്, സംഭവത്തിൽ കേന്ദ്രം ഇടപെടുകയും കേസ് അന്വേഷിക്കുകയാണെന്ന് കേന്ദ്ര തൊഴിൽ മന്ത്രി മൻസുഖ് മാണ്ഡവ്യ പ്രസ്താവിക്കുകയും ചെയ്തിരുന്നു.