കൊല്‍ക്കത്ത: കൊല്‍ക്കത്തയില്‍ വനിതാ ഡോക്ടറെ ക്രൂരമായി ബലാത്സംഗം ചെയ്ത് കൊലപ്പെടുത്തിയ കേസില്‍ ആര്‍.ജി കാര്‍ ആശുപത്രിയുടെ സുരക്ഷ ഏറ്റെടുത്ത് സിഐഎസ്എഫ് ഉദ്യോഗസ്ഥര്‍. അക്രമം തടയുന്നതിനും മെഡിക്കല്‍ പ്രൊഫഷണലുകള്‍ക്ക് സുരക്ഷിതമായ തൊഴില്‍ സാഹചര്യം ഒരുക്കുന്നതിനായി സുപ്രീം കോടതി നാഷണല്‍ ടാസ്‌ക് ഫോഴ്സ് രൂപീകരിച്ചതിന് പിന്നാലെയാണിത്.
Read Also; ഹേമാ കമ്മിറ്റി റിപ്പോര്‍ട്ടിനെ വിമര്‍ശിച്ച് തനുശ്രീ ദത്ത
ഉന്നതാധികാരികളുടെ ആവശ്യപ്രകാരം ചില അസൈന്‍മെന്റുകള്‍ക്കായാണ് ഇവിടെ എത്തിയതെന്ന് സിഐഎസ്എഫ് ഡെപ്യൂട്ടി ഇന്‍സ്‌പെക്ടര്‍ ജനറല്‍ കെ പ്രതാപ് സിംഗ് പറഞ്ഞു. അക്രമം തടയുന്നതിനും മെഡിക്കല്‍ പ്രൊഫഷണലുകള്‍ക്ക് സുരക്ഷിതമായ തൊഴില്‍ സാഹചര്യം ഒരുക്കുന്നതിനുമായി പത്തംഗ ടാസ്‌ക് ഫോഴ്‌സിനെ ചൊവ്വാഴ്ചയാണ് സുപ്രീം കോടതി രൂപീകരിച്ചത്. ടാസ്‌ക് ഫോഴ്സില്‍ സര്‍ജന്‍ വൈസ് അഡ്മിറല്‍ ആര്‍തി സരിന്‍ അടക്കമുള്ളവരും ഉള്‍പ്പെടുന്നു.
രാജ്യവ്യാപക പ്രതിഷേധത്തിന് ഇടയാക്കിയ കൊല്‍ക്കത്ത സംഭവത്തില്‍ സുപ്രീം കോടതി സ്വമേധയാ കേസ് ഏറ്റെടുക്കുകയായിരുന്നു. മൂന്നാഴ്ചയ്ക്കുള്ളില്‍ ഇടക്കാല റിപ്പോര്‍ട്ടും രണ്ട് മാസത്തിനുള്ളില്‍ അന്തിമ റിപ്പോര്‍ട്ടും സമര്‍പ്പിക്കാന്‍ ടാസ്‌ക് ഫോഴ്സിന് നിര്‍ദ്ദേശം നല്‍കുകയും ചെയ്തു. ലിംഗാധിഷ്ഠിത അക്രമങ്ങള്‍ തടയുന്നതിനും ഇന്റേണുകള്‍ക്കും താമസക്കാര്‍ക്കും പ്രവാസി ഡോക്ടര്‍മാര്‍ക്കും മാന്യമായ ജോലിസ്ഥലം ഉറപ്പാക്കുന്നതിനും ടാസ്‌ക് ഫോഴ്സ് ഒരു കര്‍മപദ്ധതി തയ്യാറാക്കുമെന്നും കോടതി പറഞ്ഞു.
കേസന്വേഷണത്തിന്റെ നിലവിലെ സ്ഥിതി എന്താണെന്ന് വ്യക്തമാക്കുന്ന സ്റ്റാറ്റസ് റിപ്പോര്‍ട്ട് സമര്‍പ്പിക്കാന്‍ സിബിഐയോട് സുപ്രീം കോടതി ആവശ്യപ്പെട്ടിട്ടുണ്ട്. അതിന് പുറമെ ആഗസ്ത് 15ന് ആര്‍ജി കാര്‍ ആശുപത്രിയില്‍ നടന്ന ആള്‍ക്കൂട്ട ആക്രമണത്തിന്റെ തല്‍സ്ഥിതി റിപ്പോര്‍ട്ട് സമര്‍പ്പിക്കാനും കോടതി പശ്ചിമ ബംഗാള്‍ സര്‍ക്കാരിനോട് ആവശ്യപ്പെട്ടു.
Post Your Comments