കഴിക്കുന്നത് വീട്ടിൽ നിന്നും പാകം ചെയ്ത ഭക്ഷണം, കെജ്രിവാളിന് ആരോഗ്യ പ്രശ്നങ്ങളില്ല: ആപ്പിന്റെ വാദം തള്ളി തിഹാർ ജയിൽ

ഡൽഹി മുഖ്യമന്ത്രി അരവിന്ദ് കെജ്രിവാളിന്റെ ആരോഗ്യനില സംബന്ധിച്ച് ആം ആദ്മി പാർട്ടിയുടെ ആരോപണങ്ങൾ തള്ളി തിഹാർ ജയിൽ അധികൃതർ. കെജ്രിവാളിന്റെ ആരോഗ്യനില തൃപ്തികരമാണെന്നും ആശങ്കപ്പെടേണ്ടതില്ലെന്നും അധികൃതർ അറിയിച്ചു. മെഡിക്കൽ പ്രൊഫഷണലുകളുടെ സ്ഥിരമായ വിലയിരുത്തലുകൾ അദ്ദേഹത്തിന് ലഭിക്കുന്നുണ്ടെന്നും ജയിൽ അധികൃതർ വ്യക്തമാക്കി.

സെൻട്രൽ ജയിൽ നമ്പർ 2 സൂപ്രണ്ടിൻ്റെ ഓഫീസ് പറയുന്നതനുസരിച്ച്, കോടതിയുടെ നിർദ്ദേശപ്രകാരം വീട്ടിൽ പാകം ചെയ്ത ഭക്ഷണം ഉൾപ്പെടെ മെഡിക്കൽ നിർദ്ദേശിച്ച ഭക്ഷണക്രമമാണ് കെജ്‌രിവാൾ പിന്തുടരുന്നത്. ‘ചെറുതായി ഭാരം കുറഞ്ഞെങ്കിലും ആരോഗ്യം തൃപ്തികരമാണ്. എല്ലാ രോഗങ്ങൾക്കുമുള്ള വൈദ്യ സഹായവും ഏർപ്പെടുത്തിയിട്ടുണ്ട്’ അധികൃതർ പ്രസ്താവനയിൽ അറിയിച്ചു.

എഎപി മന്ത്രിമാരുടെയും നിയമസഭാംഗങ്ങളുടെയും അവകാശവാദങ്ങൾക്ക് വിരുദ്ധമാണ് ആരോഗ്യസ്ഥിതി റിപ്പോർട്ടുകൾ എന്ന് ജയിൽ ഉദ്യോഗസ്ഥർ ഊന്നിപ്പറഞ്ഞു. അറസ്റ്റിനെത്തുടർന്ന് അരവിന്ദ് കെജ്‌രിവാളിൻ്റെ ഭാരം 8.5 കിലോഗ്രാം കുറയുകയും രക്തത്തിലെ പഞ്ചസാരയുടെ അളവ് 50 മില്ലിഗ്രാം/ഡിഎല്ലിൽ താഴെ 5 തവണ കുറയുകയും ചെയ്തുവെന്ന് എഎപി രാജ്യസഭാ എംപി സഞ്ജയ് സിംഗ് ആരോപിച്ചതിന് പിന്നാലെയാണ് തിഹാർ ജയിലിൻ്റെ പ്രതികരണം .