പരീക്ഷാച്ചൂട്!! ഹയർസെക്കൻഡറി, വിഎച്ച്എസ്ഇ പരീക്ഷകൾ ഇന്നാരംഭിക്കും

തിരുവനന്തപുരം: സംസ്ഥാനത്തെ ഹയർസെക്കൻഡറി, വൊക്കേഷണൽ ഹയർസെക്കൻഡറി പരീക്ഷകൾ ഇന്ന് മുതൽ ആരംഭിക്കും. 26 വരെയാണ് പരീക്ഷകൾ നടക്കുന്നത്. ഇത്തവണ 9 ലക്ഷത്തിലധികം വിദ്യാർത്ഥികളാണ് ഹയർസെക്കൻഡറി, വിഎച്ച്എസ്ഇ പരീക്ഷകളിൽ മാറ്റുരയ്ക്കാൻ എത്തുന്നത്. ആകെ 1994 പരീക്ഷാ കേന്ദ്രങ്ങളാണ് സജ്ജീകരിച്ചിരിക്കുന്നത്. കേരളത്തിന് പുറമേ, 8 കേന്ദ്രങ്ങൾ ഗൾഫ് മേഖലയിലും ലക്ഷദ്വീപിലും ഉണ്ട്. 6 പരീക്ഷാ കേന്ദ്രങ്ങളാണ് മാഹിയിൽ സജ്ജമാക്കിയിരിക്കുന്നത്.

4,14,159 വിദ്യാർത്ഥികൾ ഒന്നാം വർഷ പരീക്ഷയും, 4,41,213 വിദ്യാർത്ഥികൾ രണ്ടാം വർഷ പരീക്ഷയും എഴുതുന്നതാണ്. ഏപ്രിൽ 1 മുതൽ മൂല്യനിർണ്ണയം ആരംഭിക്കും. മൂല്യനിർണ്ണയം നടത്തുന്നതിനായി 52 സിംഗിൾ വാല്വേഷൻ ക്യാമ്പുകളാണ് ഉള്ളത്. കൂടാതെ, 25 ഡബിൾ വാല്വേഷൻ ക്യാമ്പുകളും ഒരുക്കിയിട്ടുണ്ട്. ഇത്തരത്തിൽ ആകെ 77 കേന്ദ്രീകൃത മൂല്യനിർണയ ക്യാമ്പുകളാണ് സജ്ജമാക്കിയിരിക്കുന്നത്. വരും ദിവസങ്ങളിലായി സ്കൂളുകളിലെ വാർഷിക പരീക്ഷകളും ആരംഭിക്കുന്നതാണ്.