കയ്യിൽ സ്വർണ അമ്പും വില്ലുമായി ‘രാം ലല്ല’; അയോധ്യയിലെ ശ്രീരാമ വിഗ്രഹത്തിന്റെ പൂർണ ചിത്രം പുറത്ത്

രാമക്ഷേത്രത്തിന്റെ പ്രതിഷ്ഠാ ചടങ്ങിന്റെ മുന്നോടിയായുള്ള ആചാരങ്ങളുടെ ഭാഗമായാണ് ശ്രീകോവിലിനുള്ളിൽ രാമലല്ല വിഗ്രഹം സ്ഥാപിച്ചിരിക്കുന്നത്. 22ന് പ്രാണപ്രതിഷ്ഠ നടത്തുന്ന ശ്രീരാമവിഗ്രഹത്തിന്റെ പൂർണ ചിത്രം പുറത്ത്. ശ്രീരാമന്റെ അഞ്ചു വയസ്സുള്ള രൂപമായ ‘രാം ലല്ല’ വിഗ്രഹമാണ് ക്ഷേത്രത്തിൽ സ്ഥാപിക്കുന്നത്. മൈസൂരുവിലെ ശിൽപി അരുൺ യോഗിരാജ് നിർമിച്ച 51 ഇഞ്ച് ഉയരമുള്ള വിഗ്രഹം കരിങ്കല്ലിലാണ് നിർമിച്ചിരിക്കുന്നത്.

നേരത്തെ, രാം ലല്ലയുടെ പ്രതിമയുടെ ആദ്യ ദൃശ്യങ്ങൾ പങ്കുവെച്ചിരുന്നു. അത് വിഗ്രഹം വെള്ള തുണി കൊണ്ട് മൂടിയതായിരുന്നു. വ്യാഴാഴ്ച ഉച്ചയോടെ രാം ലല്ല വിഗ്രഹം ശ്രീകോവിലിൽ സ്ഥാപിച്ചതായി പ്രതിഷ്ഠാ ചടങ്ങുമായി ബന്ധപ്പെട്ട പുരോഹിതൻ അരുൺ ദീക്ഷിത് വാർത്താ ഏജൻസിയായ പിടിഐയോട് പറഞ്ഞു. പ്രാർത്ഥനകൾക്കിടയിലാണ് ഇത് ചെയ്തതെന്ന് ക്ഷേത്രത്തിന്റെ നിർമ്മാണത്തിന് മേൽനോട്ടം വഹിക്കുന്ന ബോഡിയായ ശ്രീരാമ ജന്മഭൂമി തീർത്ഥ ക്ഷേത്ര ട്രസ്റ്റ് അറിയിച്ചു.

ജനുവരി 22 ന് പ്രധാനമന്ത്രി നരേന്ദ്ര മോദിയുടെ സാന്നിധ്യത്തിൽ നടക്കുന്ന അഭിജിത്ത് മുഹൂർത്തത്തിൽ വിഗ്രഹം ക്ഷേത്രത്തിൽ പ്രതിഷ്ഠിക്കുമെന്ന് ശ്രീരാമ ജന്മഭൂമി തീർഥ ക്ഷേത്ര ട്രസ്റ്റ് ഉടുപ്പി പേജാവർ മഠം ശ്രീ വിശ്വപ്രസന്ന തീർഥ പറഞ്ഞു. ഉദ്ഘാടന ദിവസം സുരക്ഷാ കാരണങ്ങളാൽ ക്ഷണിക്കപ്പെട്ട അതിഥികളെ മാത്രമേ ക്ഷേത്രത്തിലേക്ക് പ്രവേശിപ്പിക്കൂ എന്നും അദ്ദേഹം കൂട്ടിച്ചേർത്തു. ജനുവരി 22 ന് രാമക്ഷേത്രത്തിലെ ‘പ്രൺ പ്രതിഷ്ഠ’ ചടങ്ങിന് ശേഷം, ക്ഷേത്രം അടുത്ത ദിവസം പൊതുജനങ്ങൾക്കായി തുറക്കുമെന്ന പ്രതീക്ഷയിലാണ് ഭക്തർ.