കൊച്ചി: മലയാളികളുടെ ഫുട്ബോൾ പ്രേമം എല്ലാവർക്കും അറിയാവുന്നതാണ്. തങ്ങളുടെ ഇഷ്ടതാരങ്ങളായ ലയണൽ മെസ്സി, റൊണാൾഡോ, നെയ്മർ തുടങ്ങിയവരെ ഒരിക്കലെങ്കിലും നേരിട്ട് കാണാൻ ആഗ്രഹിക്കാത്തവരില്ല. ഇപ്പോഴിതാ ഫുട്ബോൾ പ്രേമികളായ ഓരോ മലയാളികളുടെയും ആ സ്വപ്നം സാക്ഷാത്ക്കരിക്കാൻ പോവുകയാണ്. ലോകകപ്പ് ജേതാക്കളായ മെസ്സിയും സംഘവും കേരളത്തിലേക്ക് പന്തുതട്ടാൻ വരുന്നു. കൈരളി ന്യൂസിന് നൽകിയ അഭിമുഖത്തിൽ സംസാരിക്കവെ കായികമന്ത്രി വി അബ്ദുറഹ്മാൻ ആണ് ഇക്കാര്യം പറഞ്ഞത്.
‘അർജൻറീനയുടെ ഭാഗത്ത് നിന്ന് പോസിറ്റീവ് ആയ മെയിൽ വന്നിട്ടുണ്ട്, അടുത്ത ജൂലൈയിൽ ഇന്ത്യയിലേക്ക് വരാൻ ആണ് അർജന്റീന താല്പര്യപ്പെടുന്നത്. അർജന്റീനയിലെ ഫുട്ബോൾ അധികൃതരുമായി ഉടൻ തന്നെ നേരിട്ട് ചർച്ചകൾ നടത്തും’, മന്ത്രി പറയുന്നു.
അർജന്റീനയെ കൂടാതെ മറ്റ് വിദേശ രാജ്യങ്ങളും കേരളത്തിൽ വന്ന് ഫുട്ബോൾ മത്സരങ്ങൾ കളിക്കുമെന്നാണ് കായികമന്ത്രി പറയുന്നത്. എന്തായാലും ആവേശത്തിലാണ് ഫുട്ബോൾ പ്രേമികൾ. ലോക ഫുട്ബോളിലെ ഏറ്റവും മികച്ച താരവും, ഒരു ജനതയുടെ സ്വപനം നിറവേറ്റിയ ഫുട്ബോൾ മിശിഹയുമായ സാക്ഷാൽ ലയണൽ മെസ്സിയെ നേരിട്ട് കാണാൻ.
Post Your Comments