ചങ്ങനാശേരി: ഹോട്ടലുടമയെ കുത്തിക്കൊലപ്പെടുത്തിയ കേസില്‍ ജീവനക്കാരനായ യുവാവ് അറസ്റ്റിൽ. കറുകച്ചാല്‍ കൂത്രപ്പള്ളി തെങ്ങോലി ഭാഗത്ത് കൈനിക്കര വീട്ടില്‍ ജോസ് കെ. തോമസി(45)നെയാണ് അറസ്റ്റ് ചെയ്തത്. തൃക്കൊടിത്താനം പൊലീസ് ആണ് പ്രതിയെ അറസ്റ്റ് ചെയ്തത്.
മാമ്മൂട് ദൈവംപടിയിലുള്ള ഹോട്ടലിലാണ് സംഭവം. ഹോട്ടലുടമയായ മാവേലിക്കര തട്ടാരമ്പലം കുടിയൂര്‍ ഭാഗത്ത് ചെമ്പകശേരില്‍ എസ്. രഞ്ജിത്താ(37)ണ് മരണപ്പെട്ടത്. വാക്കുതര്‍ക്കത്തെത്തുടര്‍ന്ന് ജോസ് ബുധനാഴ്ച രാത്രി ഹോട്ടലില്‍ വച്ച് ഹോട്ടല്‍ ഉടമ രഞ്ജിത്തിനെ കുത്തി പരിക്കേല്‍പ്പിക്കുകയായിരുന്നു. ആശുപത്രിയിൽ ചികിത്സയിലായിരുന്ന രഞ്ജിത്ത് ഇന്നലെ വൈകുന്നേരത്തോടെ മരിച്ചു.
Read Also : മറിയക്കുട്ടിക്ക് സഹായവുമായി നടൻ കൃഷ്ണകുമാര്‍: ഒരുവര്‍ഷത്തെ പെന്‍ഷന്‍ തുക നൽകും
കഴിഞ്ഞ രണ്ടുവര്‍ഷമായി തട്ടാരമ്പലം സ്വദേശിയായ രഞ്ജിത്ത് ദൈവംപടിയിലുള്ള ഹോട്ടല്‍ ഏറ്റെടുത്തു നടത്തിവരികയായിരുന്നു. അടുത്ത ദിവസങ്ങളില്‍ രഞ്ജിത്തും ജീവനക്കാരനായ ജോസും തമ്മിലുണ്ടായ അഭിപ്രായ ഭിന്നതയാണ് കൊലപാതകത്തില്‍ കലാശിച്ചത്.
അതേസമയം, അക്രമത്തിനുശേഷം രക്ഷപ്പെട്ട പ്രതി ജോസിനെ തൃക്കൊടിത്താനം പൊലീസ് പിടികൂടുകയുമായിരുന്നു. തൃക്കൊടിത്താനം സ്റ്റേഷന്‍ എസ്എച്ച്ഒ ജി. അനൂപിന്‍റെ നേതൃത്വത്തിലാണ് ഇയാളെ അറസ്റ്റ് ചെയ്തത്. ഇയാളെ കോടതിയിൽ ഹാജരാക്കും.
Post Your Comments