മണ്ണഞ്ചേരി: എക്സൈസ് സംഘത്തിന്റെ രാത്രികാല പരിശോധനക്കിടെ 3.1 കിലോ കഞ്ചാവുമായി യുവാവ് പിടിയില്‍. മാരാരിക്കുളം കളിത്തട്ട് ജംഗ്ഷന് സമീപം വെച്ചാണ് യുവാവിനെ പിടികൂടിയത്.
ആലപ്പുഴ ആലിശ്ശേരി വാർഡിൽ ചിറയിൽ വീട്ടിൽ ഹമീദ് മകൻ സക്കീർ ഹുസൈൻ (26) ആണ് ആലപ്പുഴ എക്സൈസ് എൻഫോഴ്സ്മെന്റ് ആന്റ് ആന്റി നർക്കോട്ടിക് സ്പെഷ്യൽ സ്ക്വാഡ് സർക്കിൾ ഇൻസ്പെക്ടർ എം മഹേഷിന്റെ നേതൃത്വത്തിൽ നടത്തിയ രാത്രികാല പരിശോധനയിൽ എക്സൈസ് സംഘത്തിന്റെ പിടിയിലായത്.
അന്യ സംസ്ഥാനങ്ങളിൽ നിന്നും കഞ്ചാവ് കേരളത്തിൽ എത്തിച്ച് മൊത്തമായും ചില്ലറയായും വില്‍പ്പന നടത്തിയിരുന്ന ഇയാൾ ദിവസങ്ങളായി എക്സൈസ് സ്ക്വാഡ് ഷാഡോ സംഘത്തിന്റെ നിരീക്ഷണത്തിലായിരുന്നു. ഇതിനൊടുവിലാണ് രാത്രികാല പരിശോധനക്കിടെ ഇയാളെ പിടികൂടിയത്.
എക്സൈസ് പ്രിവന്റ്റ്റീവ് ഓഫീസർ ജി ഗോപകുമാർ, പ്രിവന്റ്റ്റീവ് ഓഫീസർ ഗ്രേഡ് കെ പി സജിമോൻ, സിവിൽ എക്സൈസ് ഓഫീസർമാരായ എം റെനി, എസ് ആർ റഹീം, എസ് ദിലീഷ്, വനിതാ സിവിൽ എക്സൈസ് ഓഫീസർ എസ് സൗമിലാ മോൾ, ഡ്രൈവർ പ്രദീപ് എന്നിവർ പരിശോധനയില്‍ പങ്കെടുത്തു. കോടതിയിൽ ഹാജരാക്കിയ പ്രതിയെ റിമാന്റ് ചെയ്തു.
Post Your Comments