നിങ്ങൾ പി.എഫ് അക്കൗണ്ട് ഉടമയാണോ? അക്കൗണ്ട് ബാലൻസ് നോക്കുന്നത് എങ്ങനെ? – മൂന്ന് എളുപ്പവഴികൾ

ന്യൂഡൽഹി: ഇപിഎഫ്, അല്ലെങ്കിൽ എംപ്ലോയീസ് പ്രൊവിഡന്റ് ഫണ്ട്, പിഎഫ് എന്നാണ് പൊതുവെ അറിയപ്പെടുന്നത്. സംഘടിത മേഖലയിലെ ജീവനക്കാർക്കായുള്ള സർക്കാർ സ്‌പോൺസേർഡ് സേവിംഗ്സ് പദ്ധതിയാണിത്. 1956-ലെ എംപ്ലോയീസ് പ്രൊവിഡന്റ് ഫണ്ട് ആക്ട് അനുസരിച്ച്, EPFO ​​(എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ) എല്ലാ വർഷവും EPF പലിശ നിരക്ക് പ്രഖ്യാപിക്കുന്നു. പ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (ഇപിഎഫ്ഒ) പ്രൊവിഡന്റ് ഫണ്ട് (പിഎഫ്) അക്കൗണ്ടുകളിലേക്ക് പലിശ ചേർക്കുന്നത് എങ്ങനെ അറിയും? അതിന് അക്കൗണ്ട് ബാലൻസ് പരിശോധിക്കുക തന്നെ വേണം. എല്ലാ വർഷവും ഇപിഎഫ്ഒയുടെ സെൻട്രൽ ബോർഡ് ഓഫ് ട്രസ്റ്റീസ് (സിബിടി) ധനമന്ത്രാലയവുമായി കൂടിയാലോചിച്ചാണ് പലിശ നിരക്ക് തീരുമാനിക്കുന്നത്.

പ്രൊവിഡന്റ് ഫണ്ട് അക്കൗണ്ട് ബാലൻസ് എങ്ങനെ പരിശോധിക്കും? ടെക്‌സ്‌റ്റ് മെസേജ്, മിസ്‌ഡ് കോൾ, ഉമാങ് ആപ്പ്, ഇപിഎഫ്ഒ വെബ്‌സൈറ്റ് എന്നിവ വഴി വിവിധ രീതിയിൽ ബാലൻസ് പരിശോധിക്കാം. നിങ്ങളുടെ ഇപിഎഫ് ബാലൻസ് പരിശോധിക്കുന്നതിന് മുമ്പ് നിങ്ങളുടെ തൊഴിലുടമ നിങ്ങളുടെ യൂണിവേഴ്സൽ അക്കൗണ്ട് നമ്പർ (യുഎഎൻ) സജീവമാക്കിയിട്ടുണ്ടെന്ന് ഉറപ്പാക്കുക. EPF-എൻറോൾ ചെയ്ത എല്ലാ ജീവനക്കാർക്കും ഒരു യു‌എഎൻ അല്ലെങ്കിൽ യൂണിവേഴ്സൽ അക്കൗണ്ട് നമ്പർ ഉണ്ടാകും. നിങ്ങളുടെ PF അക്കൗണ്ട് ബാലൻസ് പരിശോധിക്കുന്നതിനുള്ള ലളിതമായ വഴികൾ എന്തൊക്കെയെന്ന് നോക്കാം:

എസ്എംഎസ് വഴി പിഎഫ് അക്കൗണ്ട് ബാലൻസ് പരിശോധിക്കാം:

ഘട്ടം – 1 7738299899 എന്ന നമ്പറിലേക്ക് ‘EPFOHO UAN ENG’ എന്ന സന്ദേശം അയയ്‌ക്കുക. സന്ദേശത്തിന്റെ അവസാന മൂന്ന് അക്കങ്ങൾ നിങ്ങൾ തിരഞ്ഞെടുത്ത ഭാഷയെ സൂചിപ്പിക്കുന്നു. ഇവിടെ ENG എന്നാൽ ഇംഗ്ലീഷ് എന്നാണ് അർത്ഥമാക്കുന്നത്. ഇംഗ്ലീഷ്, ഹിന്ദി, തമിഴ്, മറാത്തി, ബംഗാളി, കന്നഡ, പഞ്ചാബി, തെലുങ്ക്, മലയാളം, ഗുജറാത്തി എന്നിങ്ങനെ മൊത്തം 10 ഭാഷകളിൽ നിന്ന് സ്വന്തം ഭാഷ തിരഞ്ഞെടുക്കാം.

ഘട്ടം – 2 നിങ്ങളുടെ മൊബൈൽ നമ്പർ യൂണിവേഴ്സൽ അക്കൗണ്ട് നമ്പറിൽ (UAN) രജിസ്റ്റർ ചെയ്തിട്ടുണ്ടെന്ന് ഉറപ്പാക്കണം.

ഘട്ടം – 3 ഇപിഎഫ്ഒ ​​നിങ്ങളുടെ ബാലൻസ് വിശദാംശങ്ങൾ നിങ്ങളുടെ മൊബൈൽ നമ്പറിലേക്ക് സന്ദേശം വഴി അയയ്ക്കും.

ഇപിഎഫ്ഒ ഈ അടുത്തിടെ പലിശ നിരക്കുകളിൽ ഭേദഗതി വരുത്തിയിരുന്നു. പണം ക്രെഡിറ്റ് ആകുന്നത് പരിശോധിക്കാൻ ഉപയോക്താക്കൾക്ക് വിവിധ മാർഗം ഉപയോഗിക്കാം

EPFO പോർട്ടൽ വഴി ബാലൻസ് പരിശോധിക്കാം:

ഘട്ടം 1: ഔദ്യോഗിക EPFO ​​വെബ്‌സൈറ്റ് സന്ദർശിക്കുക- www.epfindia.gov.in.

ഘട്ടം 2: ‘ഞങ്ങളുടെ സേവനങ്ങൾ’ ടാബിൽ നിന്ന്, ‘ജീവനക്കാർക്കായി’ ക്ലിക്ക് ചെയ്യുക.

ഘട്ടം 3: ഇപ്പോൾ, ‘സേവനങ്ങൾ’ എന്ന ഓപ്‌ഷനു കീഴിലുള്ള ‘അംഗ പാസ്ബുക്ക്’ ഓപ്ഷനിൽ ക്ലിക്ക് ചെയ്യുക.

ഘട്ടം 4: നിങ്ങളുടെ യുഎഎൻ, പാസ്‌വേഡ് എന്നിവ ഉപയോഗിച്ച് ലോഗിൻ ചെയ്യുക.

ഘട്ടം 5: ലോഗിൻ ചെയ്‌ത ശേഷം, നിങ്ങളുടെ ഇപിഎഫ് അക്കൗണ്ട് ആക്‌സസ് ചെയ്യാൻ കഴിയും.

മിസ്ഡ് കോൾ വഴി ബാലൻസ് പരിശോധിക്കുന്നത്:

നിങ്ങളുടെ ഇപിഎഫ് ബാലൻസിനെക്കുറിച്ച് അന്വേഷിക്കാൻ നിങ്ങളുടെ രജിസ്റ്റർ ചെയ്ത മൊബൈൽ നമ്പറിൽ നിന്ന് 011-22901406 എന്ന നമ്പറിലേക്ക് ഒരു മിസ്‌ഡ് കോൾ അടിക്കുക. നിങ്ങളുടെ KYC വിശദാംശങ്ങളുമായി UAN സംയോജിപ്പിച്ചാൽ മാത്രമേ ഈ സേവനം ലഭ്യമാകൂ. നിങ്ങൾക്ക് ഇത് ചെയ്യാൻ കഴിയുന്നില്ലെങ്കിൽ നിങ്ങളുടെ തൊഴിലുടമയുമായി ബന്ധപ്പെടുക.