റഷ്യയിലെ കൂലിപ്പട്ടാളമായ വാഗ്നര്‍ സേനയുടെ തലവന്‍ യെവ്‌ഗെനി പ്രിഗോഷിന്‍ കൊല്ലപ്പെട്ടതായി റിപ്പോർട്ട്

മോസ്‌കോ: റഷ്യയിലെ കൂലിപ്പട്ടാളമായ വാഗ്നര്‍ സേനയുടെ തലവന്‍ യെവ്‌ഗെനി പ്രിഗോഷിന്‍ കൊല്ലപ്പെട്ടുവെന്ന് റിപ്പോർട്ട്. വിമാന അപകടത്തിലാണ് സംഭവമെന്നാണ് ബി.ബി.സി റിപ്പോർട്ട് ചെയ്തിരിക്കുന്നത്. മോസ്‌കോയിൽ നിന്ന് സെന്റ് പീറ്റേഴ്‌സ്ബർഗിലേക്കുള്ള ബിസിനസ്സ് ജെറ്റ് തകർന്നുവീണ് പ്രിജോഷിൻ അടക്കം വിമാനത്തിലുണ്ടായിരുന്ന 10 പേരും കൊല്ലപ്പെട്ടതായി റഷ്യൻ എമർജൻസി ഉദ്യോഗസ്ഥർ അറിയിച്ചു.
കൂലിപ്പടയാളി മേധാവി യെവ്ജെനി പ്രിഗോജിൻ യാത്രക്കാരുടെ പട്ടികയിൽ ഉണ്ടായിരുന്നതായി അധികൃതർ പറഞ്ഞു. എന്നാൽ ഇയാൾ വിമാനത്തിൽ ഉണ്ടായിരുന്നോ എന്ന കാര്യത്തിൽ വ്യക്തതയില്ല.

വാഗ്നർ പ്രൈവറ്റ് മിലിട്ടറി കമ്പനിയുടെ സ്ഥാപകനായ പ്രിഗോഷിന്റേതാണ് ജെറ്റ് എന്ന് സ്ഥിരീകരിക്കാത്ത റിപ്പോർട്ടുകളും ഉണ്ട്. വിമാനത്തിൽ മൂന്ന് പൈലറ്റുമാരും ഏഴ് യാത്രക്കാരും ഉണ്ടായിരുന്നുവെന്ന് അടിയന്തര ഉദ്യോഗസ്ഥരെ ഉദ്ധരിച്ച് റഷ്യയുടെ സ്റ്റേറ്റ് ന്യൂസ് ഏജൻസി ടാസ് പറഞ്ഞു. മോസ്‌കോയിൽ നിന്ന് 100 കിലോമീറ്ററിലധികം (60 മൈൽ) വടക്കുള്ള ത്വെർ മേഖലയിൽ സംഭവിച്ച അപകടത്തെക്കുറിച്ച് അന്വേഷിക്കുകയാണെന്ന് അധികൃതർ പറഞ്ഞു.

റഷ്യന്‍ പ്രസിഡന്റ്‌ പുടിന്റെ വിശ്വസ്തനും വ്യവസായിയുമായ യെവ്ഗനി പ്രിഗോഷിന്‍ 2014-ല്‍ രൂപവത്കരിച്ച സ്വകാര്യ സൈനിക സംഘമാണ് പി.എം.സി. വാഗ്നര്‍ അഥവാ വാഗ്നര്‍ പട്ടാളം. വിദേശത്തെ സൈനിക നടപടിക്ക് റഷ്യ ഉപയോഗിക്കുന്ന കൂലിപ്പട്ടാളമാണ് ഇവര്‍. 250 പേരുമായി തുടങ്ങിയ സംഘം എട്ടുവര്‍ഷം കൊണ്ട് അമ്പതിനായിരത്തോളം അംഗങ്ങളുള്ള വലിയ സംഘമായി മാറി.