ഫേസ്‌ബുക്കിലൂടെ പരിചയപ്പെട്ട യുവതിയുടെ നഗ്ന ദൃശ്യങ്ങൾ പകർത്തി പണം തട്ടിയ യുവാവ് അറസ്റ്റിൽ

കോട്ടയം: ഫേസ്‌ബുക്ക് വഴി പരിചയപ്പെട്ട യുവതിയെ ലോഡ്ജ് മുറിയിലെത്തിച്ച് ലൈംഗിക പീഡനത്തിരയാക്കിയ കേസിൽ യുവാവ് അറസ്റ്റിൽ. പാലാ കൊഴുവനാൽ സ്വദേശി സോനു സണ്ണി ആണ് അറസ്റ്റിലായത്. പാലാ സ്വദേശിനിയായ പെൺകുട്ടിയാണ് ഇയാൾക്കെതിരെ പോലീസിൽ പരാതി നൽകിയത്. ഫേസ്‌ബുക്ക് വഴിയാണ് സണ്ണി യുവതിയുമായി പരിചയത്തിലാകുന്നത്. സ്വകാര്യ ലോഡ്ജിലെത്തിച്ചായിരുന്നു ഇയാൾ പെൺകുട്ടിയെ ലൈംഗിക പീഡനത്തിനിരയാക്കിയത്.

സണ്ണിയുടെ ആവശ്യപ്രകാരമാണ് യുവതി ഇയാളെ കാനെത്തിയത്. ശേഷം ലോഡ്ജിൽ മുറിയെടുത്തു. ഇവിടെ വെച്ച് ഇയാൾ ഇവരെ പീഡിപ്പിക്കുകയായിരുന്നു. യുവതി അറിയാതെ നഗ്നദൃശ്യങ്ങൾ സണ്ണി മൊബൈലിൽ പകർത്തുകയും ചെയ്തു. പിന്നീട് ഇത് കാണിച്ച് യുവതിയെ ഭീഷണിപ്പെടുത്തി. നഗ്ന ദൃശ്യങ്ങൾ ബന്ധുക്കൾക്ക് അയച്ച് കൊടുക്കുമെന്ന് പറഞ്ഞായിരുന്നു ഇയാൾ യുവതി ഭീഷണിപ്പെടുത്തിയിരുന്നത്.

ദൃശ്യങ്ങൾ പുറത്തുവിടാതിരിക്കാൻ ഇരുപതിനായിരം രൂപയും രണ്ട് പവന്റെ സ്വർണ മാലയും യുവതി സണ്ണിക്ക് നൽകി. എന്നാൽ, ദൃശ്യങ്ങൾ ഡിലീറ്റ് ചെയ്യാതെ വീണ്ടും ഇയാൾ പണം ആവശ്യപ്പെട്ടു. ഇതോടെയാണ് യുവതി പരാതിയുമായി പോലീസിനെ സമീപിച്ചത്. യുവതിയുടെ പരാതിയിൽ യുവാവിനെ പോലീസ് അറസ്റ്റ് ചെയ്തു.