ചന്ദ്രയാൻ 3: ഇന്ന് ഉച്ചയോടെ ഭ്രമണപഥം വീണ്ടും ഉയർത്തും, കാത്തിരിപ്പോടെ ശാസ്ത്രജ്ഞർ

രാജ്യത്തിന്റെ അഭിമാന ദൗത്യമായ ചന്ദ്രയാൻ 3 പേടകത്തിന്റെ ഭ്രമണപഥം ഇന്നും ഉയർത്തും. ഇന്ന് ഉച്ചയ്ക്ക് രണ്ട് മണിയോടെയാണ് ഭ്രമണപഥം ഉയർത്തുക. ദീർഘ വൃത്താകൃതിയിൽ ഭൂമിയിൽ നിന്ന് 41,603 കിലോമീറ്റർ അകലെയും, 226 കിലോമീറ്റർ അടുത്തും വരുന്ന ഭ്രമണ പഥത്തിലൂടെയാണ് നിലവിൽ ചന്ദ്രയാൻ ഭൂമിയെ വലം വയ്ക്കുന്നത്. 15 മണിക്കൂറാണ് ഒരുതവണ ഭൂമിയെ ചുറ്റാൻ എടുക്കുന്ന സമയം.

പേടകത്തിലെ ഇന്ധനം നിശ്ചിത അളവിൽ ജ്വലിപ്പിച്ചതിനുശേഷമാണ് ഭ്രമണപഥം ഉയർത്തുക. ബെംഗളൂരുവിലെ ഐഎസ്ആർഒ ടെലിമെട്രിക് കേന്ദ്രത്തിൽ നിന്നാണ് ഭ്രമണപഥം ഉയർത്തുന്നതുമായി ബന്ധപ്പെട്ടുള്ള നടപടിക്രമങ്ങൾ നടക്കുന്നത്. നിലവിൽ, രണ്ട് തവണയാണ് ഭ്രമണപഥം ഉയർത്തിയത്. ഈ രണ്ട് ഘട്ടങ്ങളും വിജയകരമായി പൂർത്തീകരിക്കാൻ സാധിച്ചിട്ടുണ്ട്. ഇനി ഈ മാസം 20, 25 തീയതികളിലാണ് ഭ്രമണപഥം വീണ്ടും ഉയർത്തുന്നത്. ഭൂമിയിൽ നിന്ന് പരമാവധി ഉയരത്തിലുള്ള ഭ്രമണപഥത്തിൽ എത്തിച്ചശേഷം ഓഗസ്റ്റ് ഒന്നോടെ ചന്ദ്രയാൻ 3 പേടകം ചന്ദ്രന്റെ ഭ്രമണപഥത്തിലേക്ക് എത്തുന്നതാണ്.

Also Read: തമിഴ്നാട് ഉന്നത വിദ്യാഭ്യാസ മന്ത്രി കെ. പൊന്മുടിയെ ഇഡി കസ്റ്റഡിയിലെടുത്തു: നടപടി 13 മണിക്കൂര്‍ നീണ്ട റെയ്ഡിന് ശേഷം