പ്രഭാസിനെ നായകനാക്കി ഓം റൗട്ട് സംവിധാനം ചെയ്ത ആദിപുരുഷിന് അടുത്തകാലത്തൊന്നും ട്രോളുകളിൽ നിന്ന് മാറ്റി നിർത്തപ്പെടുമെന്നു തോന്നുന്നില്ല. ആദ്യ ടീസർ ഇറങ്ങിയതുമുതൽ കേൾക്കുന്ന പരിഹാസവും വിമർശനങ്ങളും ചിത്രം റിലീസായി രണ്ടാഴ്ചയാവാനിരിക്കേയും തുടരുകയാണ്. പല പ്രമുഖരും ചിത്രത്തെ രൂക്ഷമായ ഭാഷയിലാണ് വിമർശിച്ചത്. അക്കൂട്ടത്തിലേക്ക് ഒരാൾകൂടി എത്തിയിരിക്കുകയാണ്.
മുൻ ഇന്ത്യൻ ക്രിക്കറ്റ് താരം വീരേന്ദർ സേവാഗാണ് ഇപ്പോൾ ആദിപുരുഷിനെതിരെ പരിഹാസവുമായി രംഗത്തെത്തിയിരിക്കുന്നത്.ട്വിറ്ററിലൂടെയാണ് സേവാഗ് ആദിപുരുഷിനേക്കുറിച്ചുള്ള തന്റെ അഭിപ്രായം പറഞ്ഞത്. ഇതിന് പ്രഭാസിന്റെ തന്നെ ബാഹുബലി എന്ന ചിത്രവുമായി ചെറിയൊരു ബന്ധവുമുണ്ട്. കട്ടപ്പ ബാഹുബലിയെ കൊന്നതെന്തിനാണെന്ന് ആദിപുരുഷ് കണ്ടപ്പോൾ മനസിലായെന്നാണ് സേവാഗിന്റെ പരിഹാസം. ഇത് ആരാധകർ ഏറ്റെടുത്തതോടെ ട്രോളുകളാൽ സോഷ്യൽ മീഡിയ നിറഞ്ഞു.
ആദ്യദിവസങ്ങളിൽ സമ്മിശ്രപ്രതികരണമായിട്ടും മൂന്നൂറ് കോടിയിലേറെ കളക്ഷൻ നേടാൻ ചിത്രത്തിനായിരുന്നു. എന്നാൽ പിന്നീട് സ്ഥിതിഗതികൾ പ്രതികൂലമാവാൻ തുടങ്ങി. ഇന്ത്യയിൽ നിന്നുള്ള ബോക്സോഫീസ് നേട്ടം ഒറ്റ അക്കത്തിൽ തുടരുകയാണ്. ചിത്രം ഇറങ്ങി ഒമ്പതാം ദിവസമായ ഞായറാഴ്ച ഇന്ത്യയിൽ എല്ലാ ഭാഷകളിൽ നിന്നുമായി ആകെ 5. 25 കോടി മാത്രമാണ് ആദിപുരുഷിന് നേടാനായത്.
Post Your Comments