വഴക്കിട്ടു, ഭർത്താവ് ചോക്ലേറ്റ് കൊണ്ടുവന്നില്ല: ഭാര്യ തൂങ്ങി മരിച്ചു

ബെംഗളൂരു: ഭർത്താവ് ചോക്ലേറ്റ് കൊണ്ടുവന്നില്ല എന്ന കാരണത്തെ ചൊല്ലി യുവതി ജീവനൊടുക്കി. മരണത്തില്‍ ആര്‍ക്കും പങ്കില്ല എന്ന് എഴുതിവച്ച ശേഷമാണ് 25 കാരിയായ യുവതി ജീവനൊടുക്കിയത്. സലൂണിൽ ജോലിക്കാരനായ ഗൗതമും ഭാര്യ നന്ദിനിയും കോളജ് കാലഘട്ടം തമ്മില്‍ അറിയുന്നവരാണ്. ദമ്പതികൾക്ക് രണ്ട് കുട്ടികളുമുണ്ട്.

കര്‍ണാടകയിലെ ഹെന്നൂർ ബന്ദെക്കടുത്ത ഹൊന്നപ്പ ലേഔട്ടിൽ ചൊവ്വാഴ്ച ഉച്ചയോടെയായിരുന്നു സംഭവം. സംഭവ ദിവസം ഗൗതം ജോലിക്ക് പോവുന്നത് നന്ദിനി തടയുകയും തുടര്‍ന്ന് ഇരുവരും ചേര്‍ന്ന് വഴക്കിടുകയും ചെയ്തു. ജോലി കഴിഞ്ഞ് വരുമ്പോൾ ചോക്ലേറ്റ് കൊണ്ട് വരാൻ നന്ദിനി ആവശ്യപ്പെടുകയും ചെയ്തു. കൊണ്ടുവരാമെന്ന് ഉറപ്പ് നൽകി വീട്ടിൽ നിന്ന് പോയ ഗൗതം പിന്നീട് നന്ദിനിയുടെ ഫോൺ കോളുകൾ എടുത്തില്ലെന്നാണ് പൊലിസിന്‍റെ കണ്ടെത്തല്‍.

11:45 ഓടെ നന്ദിനി ഭർത്താവിന് വാട്സാപ്പ് സന്ദേശങ്ങൾ അയച്ചു. താൻ പോവുകയാണെന്നും നേരത്തെ എത്തി മക്കൾക്ക് ഭക്ഷണം കൊടുക്കണമെന്നും അവരെ നന്നായി നോക്കണമെന്നുമായിരുന്നു സന്ദേശത്തിലുണ്ടായിരുന്നത്.  സന്ദേശം കണ്ട് ഭയന്ന ഗൗതം നന്ദിനിയെ വിളിച്ചെങ്കിലും ഫോണെടുത്തില്ല.

തുടർന്ന് വീട്ടിലെത്തിയ ഗൗതം നന്ദിനിയെ തൂങ്ങി മരിച്ച നിലയില്‍ കണ്ടെത്തുകയായിരുന്നു. സംഭവത്തിൽ നന്ദിനിയുടെ രക്ഷിതാക്കൾ ഗൗതമിനെതിരെ ആരോപണം ഉന്നയിച്ചിട്ടില്ല. ഹെന്നൂർ പൊലീസ്‌ അസ്വാഭാവിക മരണത്തിന് കേസ് രജിസ്റ്റർ ചെയ്ത് അന്വേഷണം നടത്തി വരികയാണ്.