ദോഹ: പാകിസ്ഥാനിൽ അടിയന്തര ലാൻഡിംഗ് നടത്തി ഇൻഡിഗോ വിമാനം. ഡൽഹിയിൽ നിന്ന് ദോഹയിലേയ്ക്ക് തിരിച്ച ഇൻഡിഗോ വിമാനമാണ് അടിയന്തരമായി പാകിസ്ഥാനിലെ കറാച്ചിയിൽ ഇറക്കിയത്. ഇന്നു പുലർച്ചെയാണ് സംഭവം. മെഡിക്കൽ എമർജൻസിയെ തുടർന്നായിരുന്നു നടപടി. ഇൻഡിഗോയുടെ 6ഇ-1736 ദോഹ വിമാനമാണ് കറാച്ചിയിലെ ജിന്ന ടെർമിനൽ ഇന്റർനാഷനൽ വിമാനത്താവളത്തിൽ അടിയന്തരമായി ഇറക്കിയത്. യാത്രക്കാരിൽ ഒരാൾക്കാണ് ആരോഗ്യപ്രശ്‌നം നേരിടേണ്ടി വന്നത്. 60കാരനായ നൈജീരിയൻ പൗരനാണ് ആരോഗ്യ പ്രശ്‌നം നേരിട്ടതെന്നാണ് വിവരം.
വിമാനത്താവളത്തിൽ എത്തിയപ്പോഴേക്കും യാത്രക്കാരൻ മരണമടഞ്ഞതായി വിമാനത്താവളം മെഡിക്കൽ സംഘം സ്ഥിരീകരിച്ചതായി ഇൻഡിഗോ അറിയിച്ചു. വാർത്താക്കുറിപ്പിലൂടെയാണ് ഇൻഡിഗോ ഇക്കാര്യം വ്യക്തമാക്കിയത്. നാലു മണിക്കൂറിന് ശേഷമാണ് കറാച്ചിയിൽ നിന്ന് വിമാനം ദോഹയിലേക്ക് തിരിച്ചത്.
Post Your Comments