തിരുവനന്തപുരം: ഓൺലൈൻ മാധ്യമ പ്രവർത്തകർ എന്ന പേരില്‍ വിനോദയാത്ര കഴിഞ്ഞെത്തിയ സ്കൂൾ സംഘത്തെ രാത്രിയിൽ തലസ്ഥാനത്ത് നഗരമധ്യത്തിലും പിന്നാലെ സ്കൂളിൽ എത്തിയും തടഞ്ഞുനിർത്തി ശല്യം ചെയ്ത യുവാക്കൾക്ക് എതിരെ പരാതി. ഒരാഴ്ച മുമ്പാണ് സംഭവം. ഫോർട്ട് ഗേൾസ് മിഷൻ എച്ച്എസ്എസിൽ നിന്നും കോട്ടയത്തേക്ക് ടൂർ പോയി മടങ്ങിയെത്തിയ സംഘത്തെയാണ് തമ്പാനൂർ ഓവർ ബ്രിജിനു സമീപം ഒരു സംഘം യുവാക്കൾ തടഞ്ഞുനിർത്തിയത്. ഇവർ ഓൺലൈൻ ചാനൽ പ്രവർത്തകർ ആണെന്ന് അവകാശപ്പെട്ടാണ് ബസ് നഗരമധ്യത്തിൽ തടഞ്ഞത്. ബസ് അമിതവേഗത്തിൽ ആണെന്നും പോലീസിൽ പരാതി നല്‍കുമെന്നും ഇവർ ഭീഷണിപ്പെടുത്തിയതായി ഡ്രൈവർ വ്യക്തമാക്കി.
അധ്യാപകർ യുവാക്കളെ ചോദ്യം ചെയ്തതോടെ യുവാക്കൾ പോലീസിനെ വിളിച്ച് ഉത്തരവുകൾ ലംഘിച്ച് 11.30ന് വിദ്യാർത്ഥികളുമായി വിനോദ് യാത്ര പോകുന്ന ബസ് തടഞ്ഞിട്ടിരിക്കുന്നു എന്ന് അറിയിക്കുകയായിരുന്നു. തുടർന്ന് നൈറ്റ് പട്രോളിംഗിൽ ഉണ്ടായിരുന്ന പോലീസ് സംഘം ഉടൻ സ്ഥലത്തെത്തി. വിവരങ്ങൾ അന്വേഷിച്ചപ്പോൾ ബസിൽ ഉണ്ടായിരുന്ന ഒരു വിദ്യാർത്ഥിക്ക് വയ്യാതെ വന്നതിതാൽ ബസ് റോഡ് വശത്ത് നിർത്തിയതിനാൽ ആണ് തിരികെ എത്താൻ വൈകിയത് എന്ന് ബസ് ജീവനക്കാരും അധ്യാപകരും പോലീസിനെ അറിയിച്ചു. യുവാക്കളുടെ സംഘം തങ്ങളെ പിന്തുടർന്നു ശല്യം ചെയ്യുകയായിരുന്നുവെന്നും യുവാക്കൾ അസഭ്യം വിളിച്ചതായും അധ്യാപകരും കുട്ടികളും പറഞ്ഞു. പലവട്ടം ബസിനെ മറികടക്കാൻ ശ്രമിച്ച സംഘം ഡ്രൈവറെ ഉൾപടെ അസഭ്യം പറഞ്ഞതായും ഇവർ അറിയിച്ചു.
Post Your Comments